Semeytany.kz – Абай гарнизонында тыл секторы бойынша әскери міндеттілер жиыны басталды. Салтанатты шара 44293 әскери бөлімінде өтті.
Жиынға облыстың түрлі өңірінен 100-ден астам әскери міндетті тартылған. Бұл шара – бейбіт және соғыс уақытында әскерлерді қамтамасыз етуге жауапты тыл мамандарын даярлау және олардың жауынгерлік әзірлігін арттыру мақсатында ұйымдастырылған.
Ашылу рәсіміне ҚР Қарулы Күштері тыл бастығының орынбасары, полковник Әсет Оразалин қатысып, тыл қызметінің маңыздылығына тоқталды.
– Кез келген әскери операцияның сәттілігі тыл жүйесінің нақты ұйымдастырылуына байланысты. Жабдықтау, медицина, көлік және логистика – осының бәрі сіздердің жауапкершіліктеріңізде. Бүгін сіздер резервтің ғана емес, ел қорғанысының стратегиялық бөлшегісіздер, – деді ол.
Жиын барысында қатысушылар әскери-есептік мамандықтары бойынша теориялық сабақтар мен практикалық жаттығулардан өтеді. Заманауи тылдық қамтамасыз ету әдістері таныстырылып, қайта даярлау жұмыстары жүргізіледі.
Мұндай жиындар резервтегі құрамды жүйелі түрде даярлаудың бір бөлігі ретінде ұдайы өткізіліп тұрады. Олар әскери міндеттілердің дағдыларын жетілдіруге және қорғаныс ісіндегі жауапкершілікті терең сезінуге мүмкіндік береді.
