Semeytany.kz – 2024 жылы Абай облысында мыңға жуық тұрғын интернет алаяқтардың құрбанына айналған. Құқық қорғау органдары тұрғындарды алаяқтықтың жаңа түрлеріне қарсы сақ болуға шақырып, алдын алу шараларын белсенді түрде жүргізіп жатыр.
Алаяқтар қулығын үнемі өзгертіп отырады
Қылмыскерлер банк қызметкері немесе полиция өкілі ретінде хабарласып, жалған тауарлар жайлы хабарландыру жариялап, мессенджерлерді бұзып, немесе жылдам табыс уәде етіп азаматтарды сан соқтырып келеді. Негізгі мақсат – жеке деректерді иемденіп, ақша ұрлау.
Кең таралған алаяқтық әдістері:
-
Жалған қоңырау: «Қауіпсіз шотқа» ақша аударуды немесе SMS-кодты сұрайды;
-
Мессенджер бұзу: таныстарыңыздың атынан ақша сұрайды;
-
Жалған дүкендер: алдын ала төлем алып, тауар жеткізбейді;
-
Инвестициялық ұсыныстар: «тез пайда» деп сендіріп, қаражатты иемденеді.
Сақтық шаралары:
-
SMS-кодты, банк картасының деректерін ешкімге айтпаңыз;
-
Ақша сұраған адамға өзіңіз хабарласып, нақтылаңыз;
-
Екі факторлы аутентификацияны қосыңыз;
-
«Кепілдендірілген табыс» уәдесіне сенбеңіз – компанияны ресми ресурстар арқылы тексеріңіз.
Дропперлерге сақ болыңыз
Басқа біреудің ақшасы өтетін банктік шотты ашу – қылмыс. Мұндай тұлғалар «дроппер» деп аталады. Қазақстанда дропперлік үшін Қылмыстық кодекстің сәйкес бабы бойынша 12 жылға дейін бас бостандығынан айыру жазасы көзделген.
Маңызды ескерту: Бұл ақпаратты ата-аналарыңызға, зейнеткерлерге және жақындарыңызға жеткізуді ұмытпаңыз.
Жаңа алаяқтық схемаларынан хабардар болу үшін @cybercrime.kz Instagram парақшасына жазылуға кеңес беріледі.
Деректеріңізді қорғаңыз – қауіпсіздігіңіз өз қолыңызда.
