Semeytany.kz – Абай облысында Президент Қасым-Жомарт Тоқаевтың тапсырмасына сәйкес, халықты сапалы ауыз сумен қамту бағытындағы жұмыстар жалғасып жатыр. Бұл туралы өңір әкімі Берік Уәли Үкімет отырысында мәлімдеді.
Облыс басшысының айтуынша, қазіргі таңда өңір бойынша ауыз сумен қамтамасыз ету деңгейі 93,4 пайызды құрайды. Оның ішінде қалаларда бұл көрсеткіш – 94,2%, ауылдарда – 93,1%. 320 ауылдық елді мекеннің 171-і орталықтандырылған сумен қамтылған. 99 ауылда блок-модульдер орнатылған. Тағы 24 елді мекен жергілікті су көздерін пайдаланып отыр. Алайда 39,4 мың адам әлі де таза суға қол жеткізе алмай отыр.
– Мемлекет басшысының халықты таза ауыз сумен 100 пайыз қамту жөніндегі тапсырмасына сәйкес, Абай облысында жалпы сомасы 14,4 миллиард теңгеге 37 жоба жүзеге асырылуда, – деді аймақ басшысы.
Соның ішінде 10,7 млрд теңгеге 19 жоба Үкімет қолдауымен іске асып жатыр. Ал 6,2 млрд теңгеге үш жоба облыстық бюджет есебінен басталды. Қазіргі таңда бұл жобаларға 620 млн теңге бөлініп, құрылыс жұмыстары жүргізілуде. Қосымша қаржы бөлу мәселесі тиісті министрліктермен келісілуде.
Берік Уәли аталған жобалар толығымен жүзеге асқанда, өңірдегі сумен қамту мәселесі шешімін табатынын атап өтті.
