Semeytany.kz – Абай облысына жұмыс сапарымен келген Омбы облысының ресми делегациясы Семейдегі Әлихан Бөкейхан университетінде екіжақты әріптестікті нығайтуға бағытталған кездесуге қатысты.
Жиынға Омбы облысы Үкіметі төрағасының орынбасары Андрей Шпиленко мен Абай облысы әкімінің орынбасары Серік Төленбергенов қатысып, екі өңірдің экономикалық әлеуеті талқыланды.
Шара барысында Омбы өңірінің түрлі министрліктері – өнеркәсіп, кәсіпкерлік, жастар саясаты, мәдениет, туризм, ауыл шаруашылығы, цифрландыру және денсаулық сақтау салаларындағы мүмкіндіктерімен бөлісті. Абай облыстық кәсіпкерлік және индустриялық-инновациялық даму басқармасының басшысы Айбек Рахымбеков өңірдің экономикалық және инвестициялық әлеуетін таныстырып, кәсіпкерлерді қолдауға бағытталған мемлекеттік бағдарламалар жайлы мәлімет берді.
Кездесу соңында Омбы облысының Сауда-өнеркәсіп палатасы мен Абай облысының кәсіпкерлер палатасы арасында өзара ынтымақтастық туралы меморандумға, сондай-ақ өнеркәсіп саласында екі жақты әріптестікті көздейтін тағы бір келісімге қол қойылды.
Бұл құжаттар шекара маңы ынтымақтастығын нығайтып, екі өңір арасындағы экономикалық байланысты жаңа деңгейге көтеруге жол ашады.
