28 желтоқсан күні қаладағы Жастар мен балалардың шығармашылық сарайында ата-анасының қамқорлығынсыз қалған балалар мен әлеуметтік жағынан аз қамтылған, көп балалы отбасылардың балалары және озат оқушыларға арналған қала әкімінің Жаңа жылдық шыршасы өтті.
Нұрдәулет КӘКІШЕВ,
«Семей таңы»
Жаңа жылдық шыршаға қала әкімі Айбек Кәрімов бастаған жергілікті билік өкілдері, қаладағы және қала маңындағы ауыл мектептерінің мұғалімдері мен 250-ге жуық оқушылар қатысты. Жастар мен балалар шығармашылық сарайының көрермен залында ине шаншар орын болмады. Ақ ұлпа қар жамылған шыршалардың сұлбасы қойылып, қабырғаларға жаңа жыл сәні — түрлі жарқырауықтар ілініп, сахна да әдемі безендірілген екен. Мерекелік шараға арнайы тігілген киімдерін киіп, қатысқан бүлдіршіндер де көрер көзді қуантады. Мысалы, № 32 мектептің 2-сынып оқушысы Ермек Бақты мерекелік шараға Ханның киімін киіп келген.
— Хан боп киініп келуімнің себебі, өскенде Президент болғым келеді. Ал, Жаңа жылды шыршамен қарсы алғанды жақсы көремін. Барлықтарыңызды Жаңа жыл мерекесімен құттықтаймын, — дейді Ермек.
Қарша қыздың киіміндегі қаршадай қыздардың әдемі биі сахна шымылдығын ашқан соң, Елбасы Нұрсұлтан Назарбаевтың бүлдіршіндерге арналған Жаңа жылдық құттықтауы ұсынылды.
— Қымбатты балалар! Бүгінгі күні еліміздің барлық өңіріндегі балалар Жаңа жылдық шыршаның айналасына жиналды. Жаңа жыл — ең алдымен балалар мен бүлдіршіндерге қуаныш сыйлайтын мереке. Мен сендерді, сендер ар-қылы қазақстандық барша балаларды келе жатқан Жаңа жылмен құттықтаймын. Біздің Ұлы Отанымыз жылдан-жылға өркендей түсуде. Қазіргі таңда дүние жүзі қазақ елін құрметтейді. Сендер осындай ерекше елде өсіп келе жатқан бақытты ұрпақсыңдар. Ата-аналарыңды қуантыңдар. Зерделі де зерек, білімді де білікті болыңдар. Бұған елімізде барлық мүмкіндік бар. Жасампаз істердің барлығы сендердің жарқын болашақтарың үшін жасалуда. Барлық өңірлерде жаңа мектептер салынды. «Өнерлі өрге жүзеді» деген дана халқымыз. Өнер-білімнің кені, өркенді елдің теңі болыңдар. Айналасын алтын арайға бөлеген жасыл шырша – базарлы балалықтың белгісі. Шырайын бермейтін осы шыршадай жайнап өсе беріңдер. Болашақтарың баянды болсын! — деп құттықтау тілегін білдірген Елбасының сөзі сахна төріндегі үлкен экран арқылы жеткізілді.
Президенттің ұлағатты сөздерінен соң сахнада мың бұралған бишілер тобы өнер көрсетті. Одан кейін қала басшысы Айбек Кәрімов сөз алды:
— Қадірменді балалар! Келе жатқан Жаңа жыл мерекесі құтты болсын! Үлкен мерекелік шара өтіп жатқан Жастар мен балалардың шығармашылық сарайына көңілді де бақытты өмір сүріп, өсіп-өркендеп келе жатқан оқуда озат, тәрбиелі де үлгілі оқушыларды Жаңа жыл мерекесімен құттықтайық деп шақырып отырмыз. Жоғарыда баршаңызды Елбасымыз Нұрсұлтан Әбішұлы Назарбаев құттықтап, сендерге үлкен-үлкен өсиетін айтып, тілегін жолдады. Сендер – еліміздің келешегісіңдер. Ал, сендердің алаңсыз ойнап, сапалы білім алып, жақсы өмір сүрулерің үшін, болашақтарың үшін Үкімет тарапынан барлық жағдайлар жасалуда. Жаңа мектептер мен тұрғын үйлер, емханалар, сонымен қатар, спорт кешендері мен мәдени орындар салынуда. Мұның бәрі мемлекеттің болашағы — сендерге деген үлкен қамқорлықтың көрінісі. Сондықтан, Қазақстанды 2050 жылы, одан ары қарай да дамытатын өздеріңсіңдер. Ол үшін денсаулықтарың мықты, ой-өрістерің кең болуы керек. Қазірден бастап «келешекте кім боламын?» деген арман-мақсатты алға қою керек. Ал, сол арман-мақсаттарыңды жүзеге асыру үшін сабақтарыңды жақсы оқуларың қажет, — деген Айбек Мүталапханұлы, — келе жатқан Жылқы жылы да жақсы жыл болады деп үміттенеміз. Себебі, жылқы – қазақ елі үшін төрт түліктің ішіндегі ең қасиетті жануар. Сондықтан, сендердің нағыз тұлпарлар сияқты қашанда топ жаратын үлкен азамат болып өсулеріңе тілектеспін. Жаңа жыл жақсылығын ала келсін! — деді өз сөзінде.
Қала басшысының сөзінен кейін мерекелік шара балғындардың концерттік бағдарламасымен жалғасты. Концерт барысында әсем әндер шырқалып, көңілге қонымды көріністер қойылды. Сонымен қатар, сахнадағы үлкен экран арқылы еліміздің техникалық және технологиялық жетістіктері көрсетілетін индустрияландыру мен ашық алаңдар нышаны болып саналатын “ЭКСПО-2017” халықаралық көрмесін өткізуге қалай әзірленіп жатқаны жайлы бейнесюжеттер беріліп тұрды. Мерекелік кеш соңына қарай сахнаға мерекенің басты кейіпкерлері Аяз ата мен Ақшақар шығып, Жаңа жылдық шыршаның шырағын жақты. Ақ сақалды Аяз атаның ала дорбасындағы қысқы киім, бас киім, спорттық киімдер, тәттілер басқа да сыйлықтар барлық бүлдіршіндерге үлестірілді. Көңілдері шат-шадыман болған балғындар Аяз ата – Ақшақармен естелік суретке түсіп тарқасты.
