Әлеумет
Semeytany.kz – Абай облысының әкімі Берік Уәли Бесқарағай ауданының орталығында жергілікті тұрғындармен кездесті. Жиында аймақ басшысы өңірдің әлеуметтік-экономикалық дамуы және алдағы жоспарлар жайлы баяндама жасап, халықтың сұрақтарына жауап берді.
Алдымен аудан әкімі Нұрбек Қошқарбаев 2024–2025 жылдарға арналған әлеуметтік-экономикалық даму көрсеткіштерін таныстырды. Бұдан кейін сөз алған облыс әкімі Берік Уәли өңірді аралау барысында шалғай ауылдар мен бұрынғы аудан орталықтарының жай-күйімен жеке танысқанын айтты.
– Ауылдардағы жол, ауыз су, медициналық қызмет және білім мен мәдениет нысандарының жағдайы басты назарда. Бұл мәселелер Мемлекет басшысы Қасым-Жомарт Тоқаевқа баяндалды. Президент Үкіметпен бірлесе отырып, Абай облысындағы қордаланған түйткілдерді шешу туралы тапсырма берді. Осы кездесуге атқарылған жұмыстар туралы есеп беріп, алдағы жоспарлармен бөлісу үшін келіп отырмын, – деді облыс әкімі.
Берік Уәли Бесқарағай ауданында жүзеге асып жатқан нақты жобаларға тоқталды. Аудан бойынша 77,7% тозығы жеткен 39 шақырым ауыз су желісін жаңарту үшін 5,1 млрд теңге бөлінген. Глуховка, Жыланды, Мостик, Баскөл және өзге елді мекендерде бұл жұмыстар басталып кеткен.
Жол саласына биыл 974,7 млн теңге қарастырылған. Сонымен қатар 30 отбасыға арналған тұрғын үйлердің құрылысы да жүргізіліп жатыр.
Білім беру саласында 9 мектепке жөндеу жұмыстары жоспарланған. 2 мектептің шатыры күрделі жөнделіп, 5 пәндік кабинет пен 3 мектеп автобусы сатып алынады. Денсаулық сақтау бағытында аудандық аурухана шатыры мен үшінші қабатына күрделі жөндеу жүргізу үшін 100 млн теңге, ал жаңа медициналық техника алуға 82,9 млн теңге бөлінген. Канонерка ауылында амбулатория, Беген мен Бозтал ауылдарында жаңа медпункттер салу жоспарда.
Мәдениет пен спорт нысандары да назардан тыс қалған жоқ. Бесқарағай ауылында жүзу бассейні, Ерназар ауылында спорт модулі, ал Глуховка, Беген және Ерназар ауылдарында 100 орындық клуб үйлері бой көтеруде.
– Бесқарағай – аграрлық және туристік әлеуеті зор, тоғыз жолдың торабында орналасқан аудан. «Омбы–Майқапшағай» халықаралық жолының бойында тұрғаны да үлкен артықшылық. Ауданға осымен жетінші мәрте келіп отырмын. Бұған дейінгі сапарымда Канонеркадағы Мәдениет үйі мен колледждің жағдайымен таныстым. Бұл нысандарға жөндеу жүргізу үшін қаржы бөлінеді. Ауданның өзекті мәселелері кезең-кезеңімен шешіледі, – деді облыс әкімі.
