Semeytany.kz – Қазақстан Республикасы Президенті жанындағы Жастар саясаты жөніндегі кеңестің бастамасымен «Jas Keñes Sıylığı» ұлттық сыйлығына өтінім қабылдау басталды. Бұл туралы Өңірлік коммуникациялар қызметінің алаңында кеңес төрағасының орынбасары Олжас Сүлеймен мәлімдеді.
Ұйымдастырушылардың айтуынша, бұл сыйлық – ел өміріне үлес қосып жүрген, алайда көпшілікке белгісіз жас мамандарды қолдау және ынталандыру мақсатында тағайындалған. Байқауға кез келген салада еңбек етіп жүрген, жасы 35-ке дейінгі азаматтар қатыса алады.
Жеңімпаздар үш кезеңнен тұратын байқау нәтижесінде анықталады. Әр номинация бойынша екі жеңімпаздан — жалпы саны 20 жас марапатталады. Олардың әрқайсысы 1 миллион теңге көлемінде ақшалай сыйлыққа ие болады. Жалпы жүлде қоры – 20 миллион теңге.
– Бұл жоба – нақты жетістіктерімен көзге түскен жастардың еңбегін бағалауға бағытталған. Өтінімдер www.jas-kenes.kz/application сайтында онлайн түрде қабылданады, – деді Олжас Сүлеймен.
Биылғы байқаудың ауқымы кеңейіп, номинациялар саны 7-ден 10-ға артқан. Жаңа бағыттардың қатарында жас ғалымдар, ЖОО оқытушылары, дәрігерлер, ІТ саласының мамандары, креативті индустрия өкілдері мен атом өнеркәсібінде еңбек етіп жүрген жастар бар.
Абай облысының Жастар саясаты мәселелері басқармасы басшысының міндетін атқарушы Олжас Бейсенбаев облыс жастарын белсенді қатысуға шақырды.
– Өңірімізден шыққан табысты жастардың тәжірибесі өзгелерге үлгі болып, болашақ мамандарға жігер береді. Бұл – жастар үшін маңызды мүмкіндік, – деді спикер.
