Semeytany.kz – Абай облысында 13 ауыл алкоголь өнімдерін сатудан және тұтынудан толықтай бас тартқан. Бұл туралы өңірлік коммуникациялар қызметінде өткен баспасөз мәслихатында Полиция департаменті Жергілікті полиция қызметі басқармасы бастығының орынбасары, полиция подполковнигі Бауыржан Садақбаев мәлімдеді.
Қоғамдық тәртіпті нығайту – басты мақсат
Спикердің айтуынша, бұл шаралар «Заң және Тәртіп» тұжырымдамасы аясында қылмыстың алдын алу мақсатында қолға алынған. Атап айтқанда, мас күйінде жасалатын құқықбұзушылықтардың жолын кесу үшін ауылдық жерлерде алкогольге шектеу енгізілген.
– Алкоголь өнімдерін сатуға және тұтынуға қойылған шектеулердің арқасында ауылдарда құқықбұзушылық деңгейі айтарлықтай төмендеді, – деді Бауыржан Садақбаев.
Бейнебақылау мен цифрлық жүйелер енгізілуде
Облыс көлемінде қазір 1551 бейнебақылау камерасы жұмыс істеп тұр. Биыл қосымша 380 камера іске қосылған. Сонымен қатар, қауіпсіздікті күшейту үшін бет-әлпетті танитын 86 заманауи камера, дрондар, «Сергек-Қорғау» және «Кибер-шериф» сияқты интеллектуалды жүйелер қолданысқа енгізілген.
Полиция халықпен жақындаса түсті
Басқарма өкілдерінің айтуынша, бүгінде тұрғындармен кері байланыс орнату мақсатында барлық интернет платформаларда байланыс арналары ашылған. Енді азаматтар кез келген уақытта полиция қызметкерлерімен тікелей хабарласа алады. Сонымен қатар, құқықтық сауаттылықты арттыру үшін әлеуметтік желілерде профилактикалық видеороликтер мен түсіндіру материалдары тұрақты түрде жарияланып отыр.
