Semeytany.kz – Курчатов қалалық ауруханасының материалдық-техникалық базасы кезең-кезеңімен жаңартылып жатыр. Өңір басшысы Берік Уәли емдеу мекемесіне арнайы барып, жүргізілген жөндеу жұмыстарының барысын бағамдады.
2024 жылы аурухананың бірінші қабаты толық күрделі жөндеуден өткен болатын. Ал биыл наурыз айынан бастап медициналық мекемелерді жаңғырту бағдарламасы аясында облыстық бюджеттен бөлінген қаржыға төртінші қабат жаңартылды.
Қазіргі таңда ауруханада 149 медицина қызметкері жұмыс істейді. Оның 22-сі – дәрігер. Мұнда 35 төсектік тәулік бойы жұмыс істейтін стационар мен 31 төсектік күндізгі стационар бар. Алайда мекемеде кардиолог, анестезиолог-реаниматолог, жалпы практика дәрігері және педиатр мамандарының тапшылығы сезіледі.
Аурухана басшылығы өңір басшысынан үшінші қабатты жөндеуге қаржылай көмек сұрады. Бұл өтінішті назарға алған Берік Уәли тиісті қаражат бөлінетінін айтып, тұрғындар заман талабына сай сапалы медицинаға қол жеткізуі керек екенін жеткізді.
– Ғимараттың үшінші қабаты ғана қалыпты. Бұл мәселені шешіп, аурухананы толық жаңартып береміз. Халықтың денсаулығы – басты назарда, – деді облыс әкімі.
