Semeytany.kz – Абай облысының әкімі Берік Уәли Абай ауданы тұрғындарымен кездесті. Басқосуда аймақтың әлеуметтік-экономикалық даму барысы мен болашақтағы маңызды жобалар сөз болды.
Алдымен аудан әкімі Мейіржан Смағұлов 2024–2025 жылдарға арналған негізгі көрсеткіштерге тоқталды. Одан кейін сөз алған облыс басшысы өңірлік ЖӨӨ көлемінің 4,3 пайызға өсіп, 3,2 трлн теңгеге жеткенін мәлімдеді. Бұл өсімге өнеркәсіп, сауда, ауыл шаруашылығы, құрылыс және көлік салалары елеулі үлес қосқан. Сонымен қатар, 575,4 млрд теңге инвестиция тартылып, оның 75,8 пайызы жеке қаражат есебінен жүзеге асқан.
Кездесуде «Туған жерге туыңды тік» акциясы аясында ауданда 1,5 млрд теңгенің инвестициясы тартылатыны айтылды. Оның ішінде 1,2 млрд теңгеге «Этно ауыл Жидебай» жобасы бой көтермек. Бұған қоса, ядролық сынақ зардабын тартқандарға арналған оңалту орталығы ашылып, шалғай елді мекендерді интернетпен қамту жұмыстары жүргізілуде.
Абай ауданындағы инженерлік инфрақұрылым да назардан тыс қалған жоқ. Облыстағы жылу желілерінің 25 пайызы осы ауданда орналасқан. Қарауыл ауылында 1,3 шақырым жылу желісін тарту үшін құжаттар дайындалып, тиісті министрлікке өтінім жіберілген. Сонымен қатар, биыл аудан аумағындағы бірқатар жол учаскелері мен ауыл ішіндегі көшелер жөнделіп, бірнеше ауылда су құбырлары жаңартылады.
Әлеуметтік салада да ілгерілеу бар. Биыл 8 мектепке жөндеу жүргізіліп, 3 мектепке пәндік кабинет пен автобус алынбақ. Балалар лагері салынып жатыр. Әлеуметтік осал топтарға 43 пәтер берілмек. Сондай-ақ Саржал мен Көкбай ауылдарында спорттық модуль, ал аудандық мәдениет үйінде жөндеу жұмыстары қолға алынған.
Облыс әкімі Абай ауданын дамыту жалғасатынын айтып, тұрғындарды Абайдың 180 жылдығына белсене атсалысуға шақырды. «Президент Қасым-Жомарт Тоқаев айтқандай, бұл мерейтой – елдік пен мәдениетті танытатын маңызды шара», – деді ол.
Кездесу соңында тұрғындар жылу қазандығы, Семей полигоны зардаптары, жедел жәрдем қызметі, Жидебай музейін жабдықтау, жылыжай салу сынды мәселелерді көтеріп, нақты ұсыныстар айтты. Берік Уәли барлық сұрақтар назарға алынатынын, шешімі кезең-кезеңімен қарастырылатынын жеткізді.
