Semeytany.kz – Абай облысының Саржал ауылы Алматыда алғаш рет ұйымдастырылған республикалық “Бай қымыз” гастрофестивалінде бас жүлдені жеңіп алды. Бұл туралы облыс әкімі Берік Уәли өзінің әлеуметтік желідегі парақшасында жариялап, ауыл жұртын құттықтады.
– Бұл – өңіріміз үшін үлкен мәртебе әрі әділетті жеңіс! Саржалдың сары қымызы – көптен ел аузында жүрген, талай жұрттың таңдайын қақтырған табиғи өнім. Жеңіс тек дәм арқылы емес, ашық дауыс беру арқылы анықталды. Демек, бұл – халықтың өзі берген әділ баға, – деп жазды әкім.
Аймақ басшысы атап өткендей, бұл жеңіс Абайдың 180 жылдығы қарсаңында жетіп отырған рухани әрі мәдени табыс ретінде ерекше мәнге ие. Сонымен қатар, фестиваль нәтижесі ұлттық тағамдар мен дәстүрлі өнімдерді насихаттауға, ішкі туризмді дамытуға серпін береді деп сенім білдірді.
Берік Уәли қымыз өндірушілерге, ұйымдастырушыларға және дауыс берген елге алғыс айтып, жеңісті бүкіл өңірдің ортақ жетістігі ретінде бағалады.
