Semeytany.kz – Абай облысының әкімі Берік Уәли Абай ауданында өтетін Абай Құнанбайұлының 180 жылдық мерейтойына дайындық барысын тексеріп, бірқатар нысандарды аралады.
Мерейтой аясындағы басты іс-шаралар Қарауылтөбеде өтеді. Мұнда 400 орындық көрермен алаңы бар үлкен дала сахнасы, ат жарысына арналған алаң, киіз үй қалашығы, 2500 шаршы метрлік сауда аймағы, жарық, су, кәріз жүйелері және санитарлық-тұрмыстық нысандар салынуда. Жаяу жүргіншілерге арналған өткелдер жөнделіп, қосымша жолдар төселіп жатыр.
Дайындық жұмыстары туралы аймақ басшысына аудан әкімі Мейіржан Смағұлов, мерейтой штабының атқарушы хатшысы Жанжігіт Омархан, облыстық басқарма басшылары мен құқық қорғау және төтенше жағдайлар қызметінің өкілдері баяндады.
Облыс әкімі сондай-ақ Абай саябағына да барды. Мұнда абаттандыру мен көгалдандыру жұмыстары жүргізілуде. Аталған саябақта «Жеті қазына» республикалық фестивалінің ашылу салтанаты, «Сұлу әйел» және «Ер жігіт» байқаулары өтеді деп жоспарланған.
Сондай-ақ әкімге Қарауылтөбеде орнатылатын «Абай елі» атты стелла таныстырылды. Мүсіндік композицияны аудан кәсіпкерлері өз қаражатына жүзеге асырып жатыр.
– Композиция өте орынды жасалған. Бесік пен домбыра – Абай елінің рухани болмысының нышандары. «Абай елі» деген жазуы да терең мағынаға ие. Бұл жер – тұрғындар мен қонақтар жиі келетін нысанға айналады деп сенеміз, – деді Берік Уәли.
Аймақ басшысы сонымен қатар «Абай-Шәкәрім» мемориалдық кешенінде де болды. Қазір мұнда «Қазреставрация» мекемесі кесенелерді ағарту, жарықтандыру мен сырлау-бояу жұмыстарын жүргізіп жатыр.
Берік Уәли мерейтойға аз уақыт қалғанын ескертіп, барлық жұмыстарды сапалы әрі белгіленген мерзімде аяқтауды тапсырды.
