Semeytany.kz — Абай Құнанбайұлының 180 жылдық мерейтойына орай өңірде ұлттық рухты көтеріп, салауатты өмір салтын дәріптейтін ауқымды спорттық шаралар қолға алынып отыр.
Атап айтқанда, 7 тамыз күні Семей мен Қарауыл бағыты бойынша ұзындығы 180 шақырымды құрайтын ультрамарафон ұйымдастырылады. Бұл марафон – Абай жолына деген құрмет пен ұлттық мұраға тағзым ретінде өткізілмек.
Сондай-ақ, 4 тамызда Семейде «Семей батыры» атты күштік экстрим бойынша ашық турнир өтеді, ал 3–6 тамыз аралығында қазақ күресінен Қазақстан кубогының жеңімпаздары анықталады.
Ал 7–10 тамыз аралығында Қарауыл ауылында өтетін «Жеті қазына» ұлттық жобасы шеңберінде садақ ату, құсбегілік, тазы жарысы, тоғызқұмалақ, қазақ күресі, ат спорты сынды бірнеше бағыт қамтылмақ. Қазақ күресінде «Өгіз палуан» (74 кг дейін) және «Түйе палуан» (90 кг-нан жоғары) салмақ дәрежелерінде балуандар бозкілемге шығады.
Жүлде қоры да қомақты. Мәселен, аламан бәйгенің бас жеңімпазына нарықтық құны 22 миллион теңгеге дейін жететін автокөлік, тоғызқұмалақ жеңімпазына – отандық Lada Granta, «Түйе палуан» атағын жеңген спортшыға Chevrolet Monza автокөлігі табысталады. Сонымен қатар дәстүрлі садақ ату мен құсбегілік жеңімпаздарына асыл тұқымды жылқылар мен ақшалай сыйлықтар ұсынылады.
Жарыстарға Абай облысының атынан республикалық және халықаралық деңгейдегі чемпиондар қатысады. Олардың қатарында тоғызқұмалақтан әлем және Азия жүлдегері Исахан Аяна, құсбегіліктен әлем ойындарының күміс жүлдегері Ерзат Байқадамов, сондай-ақ атақты балуандар Дидар Тұқышев, Есхат Тұрсынбек, Дәурен Нуралиновтар бар.
