Semeytany.kz – Абай облысының әкімі Берік Уәли «Baiqymyz» республикалық гастрофестивалінде топ жарып, бас жүлдені жеңіп алған Саржал ауылының тұрғындарымен кездесті.
Кездесу барысында аймақ басшысы Саржалдың ұлттық сусын – қымыз өндірудегі зор еңбегін атап өтіп, ауыл тұрғындарына Алғыс хат табыстады. Астана қаласында өткен фестивальге 50-ге жуық қымыз өндіруші қатысып, Саржал құрамасы үздік деп танылып, 20 миллион теңге көлеміндегі жүлдені жеңіп алған болатын.
– Бұл жеңіс – жылдар бойы төгілген маңдай тер мен адал еңбектің әділ нәтижесі. Саржалдың сары қымызы – бүкіл елге танымал брендке айналды. Облыс болып, ел болып мақтан тұтамыз, – деді облыс әкімі.
Саржалдық кәсіпкерлердің айтуынша, ауылда 20 мыңнан астам жылқы бар және әр шаңырақ дерлік бие байлап, қымыз өндірумен айналысады. «Озат» шаруа қожалығының жетекшісі Гүлмира Болатова бұл жеңістің Абайдың 180 жылдығы қарсаңында ерекше маңызға ие екенін айтып, әкімге алғысын білдірді.
Фестиваль барысында тағы бірнеше абайлық кәсіпкер жетістікке жетті. Абай ауданынан келген Сәулет Әнуаровтың «Adil Kymyz» өнімі «Күміс торсық» аталымына лайық деп танылса, Бесқарағай ауданының «Мукинов» шаруа қожалығының «Бесқарағай» жылқысы «Қазақтың салмақты жылқысы» номинациясында үздік атанды.
