Мәуліт мерекесі Бесқарағай ауданының тұрғындарын рухани байытып, көңілдерін серпілтіп тастады. Оған себеп Семейдің «Дариға—ай» жастар театрының осынау жөні мен жолы бөлек мерекеге арнап дайындаған концерттік бағдарламасы болатын. Қаңтар айының 22-сі күні аудандық Мәдениет үйіне жиылған қауымның көптігі халықтың өнерге деген сүйіспеншілігінің бір айғағы десек те болғандай.
{jcomments on}Бесқарағай ауданы әкімінің орынбасары Ерболат Еренұлы мен Қазақстан мұсылмандары діни басқармасының Семей аймағы бойынша өкіл имамы Мақсат қажы Алтыбайдың алғы сөзімен басталған кеш ары қарай ғибратты қойылым, әуезді әнмен жалғасты. Бүгінгі таңдағы өзекті мәселелерді, теріс қылықтарды көрерменнің көз алдына қойған талант иелері, тура жолдан адасып, тағдыр талқысына түскен жандарды құтқарар құдірет иман екенін өнеріне өзек етті. Мың рет естігеннен, бір рет көргеннің артық екенін ата-бабамыз баяғыда-ақ айтып кеткен. Өнегелі хадистер мен адамгершілік турасындағы уағыздар сахналанғанда одан сайын құлпырып, халықтың көкейіне салиқалы ой салды. Ана мен баланың, әке мен ұлдың арасындағы қазіргі күнде арзандап бара жатқан сезімдер алдына көлденең қойылғанда, көңілі босамаған адам қалмады. Қоғамнан жерініп, өзгені кінәлағыш пенделер туралы «Суицид» қойылымы Алланың үлкен сыйы өмірді қастерлеуге шақырып, театр актерлерінің салған әндері де «көңіл кірін кетіріп», отырған қауымды тамаша көңіл-күйге бөледі. Қорытынды сөз алған Бесқарағай ауданының имамы Серікжан Аманұлы «халықты ынтымақ, бірлікке шақыратын осындай тағылымды кеш дәстүрге айналса» деген тілегін білдірді. Өнердің өрісін кеңейтетін де, өнерлі өрендерін көбейтетін де – халық. Әнмен сусындап, құран сөзімен қуаттанып, өнерден өнеге алған аудан тұрғындары театр ұжымына ақ батасын беріп тарқасты.
Бауыржан ИГІЛІК,
«Дариға-ай» жастар театры
әдебиет бөлімінің меңгерушісі.
