Semeytany.kz – Абай облысының әкімі Берік Уәли Жарма ауданына жұмыс сапары барысында тұрғындарды жеке мәселелері бойынша қабылдады.
Қабылдауға келген азаматтар қоқыс полигонын салу, жер учаскелерін бөлу, мал ұрлығының алдын алу, ауыл шаруашылығына арналған жер телімдері жөніндегі өтініштерін жеткізді. Облыс әкімі әрбір мәселені жеке қарап, аудан әкімі мен тиісті басқармаларға нақты тапсырмалар берді.
Берік Уәли тұрғындар көтерген әрбір мәселе жеке бақылауында болатынын атап өтіп, жер қатынастарына қатысты барлық жұмыстар тек заң аясында жүргізілетінін айтты. Ауыл шаруашылығын дамытуға ниетті азаматтарға қолдау көрсетілуі тиіс екенін де ескертті.
Жеке қабылдаудың алдында облыстық басқарма басшылары да тұрғындарды қабылдап, сұрақтарына жауап берген. Облыс әкімінің айтуынша, тұрғындар көтерген мәселелер назардан тыс қалмайды және тиісті шешімдер қабылданады.
