Мемлекет басшысы Қасым-Жомарт Тоқаев Қазақстан халқына арнаған 2026 жылғы Жолдауында елдің инфрақұрылымын жаңғыртуға және халықтың тұрмыс сапасын арттыруға бағытталған ауқымды міндеттерді белгіледі. Президент 2027 жылды Жалпыхалықтық ауқымды құрылыс жылы деп жариялауды ұсынды.
Жаңа тарихи кезеңдегі Қазақстанның өзекті міндеттеріне арналған Жолдауда азаматтық инфрақұрылымды дамыту мәселесіне ерекше назар аударылды. Мемлекет басшысының айтуынша, алдағы жылдары еліміздің барлық өңірінде құрылыс және жаңғырту жұмыстары қарқын алуы тиіс.
Жоспар бойынша жаңа автомобиль жолдары, теміржолдар, көпірлер, инженерлік желілер, энергетикалық және гидротехникалық нысандар салынады. Сонымен қатар мектептер, ауруханалар, спорт кешендері мен мәдениет ошақтарын салу және жаңарту көзделген.
Президент инфрақұрылымдық жобаларды жүзеге асыру халықтың күнделікті өміріне тікелей әсер етуі керектігін атап өтті. Әсіресе ауылдық елді мекендердегі әлеуметтік нысандарға деген қажеттілікті жан-жақты зерттеп, нақты жоспар әзірлеу тапсырылды.
Ауқымды бастаманы қаржыландыру үшін 2029 жылдың соңына дейін Ұлттық қордан шамамен 6,5 триллион теңге бөлу көзделіп отыр. Оның ішінде 2026 жыл мен 2027 жылдың алғашқы екі айында әлеуметтік жобаларды іске қосуға 1,5 триллион теңге бағыттау жоспарланған.
Алғашқы кезеңде елімізде 70-ке жуық денсаулық сақтау нысанын, сондай-ақ білім беру, спорт және мәдениет салаларына қатысты 50 нысанды салу жоспарланып отыр.
Мемлекет басшысы құрылыс жұмыстарының экономикалық тиімділігіне де тоқталды. Оның пікірінше, жаңа инфрақұрылым өндіріс орындарының ашылуына, жұмыс орындарының көбеюіне және жеке инвестициялардың тартылуына мүмкіндік береді.
Жолдауда көлік-логистика саласын дамыту, энергетикалық қауіпсіздікті қамтамасыз ету, ауыл шаруашылығын қолдау және цифрлық экономиканы қалыптастыру мәселелері де қамтылды.
Президенттің айтуынша, елдің тұрақты дамуы үшін өңірлердің әлеуетін арттыру маңызды. Қуатты қалалар мен дамыған аймақтар күшті мемлекеттің негізін қалайды.
Осылайша, алдағы жылдары қолға алынатын ауқымды құрылыс жұмыстары Қазақстанның инфрақұрылымдық келбетін өзгертіп қана қоймай, азаматтардың өмір сүру сапасын жақсартуға бағытталмақ.
