Қазақстан Республикасының Конституциясында әр азаматтың жеке меншікке ие болу және өз мүлкін заң аясында пайдалану құқығына кепілдік берілген. Бұл норма адамның тұрмыстық жағдайына ғана емес, кәсіпкерлікпен айналысуына да тікелей қатысты.
Ата Заңның 29-бабына сәйкес, Қазақстан Республикасы азаматтарының заңды түрде алған кез келген мүлкіне жеке меншік құқығы бар. Сонымен қатар меншікке және мұрагерлік құқыққа заңмен кепілдік беріледі. Яғни азаматтың үйі, жері, көлігі немесе өзге де заңды жолмен иеленген мүлкі құқықтық қорғауда болады.
Конституцияда сот шешімінсіз ешкімді өз мүлкінен айыруға болмайтыны да нақты көрсетілген. Ал мемлекет мұқтажы үшін мүлікті мәжбүрлеп иеліктен шығаруға тек заңда көзделген айрықша жағдайда және оның тең құны өтелген кезде ғана жол беріледі.
Бұл бап кәсіпкерлік қызмет еркіндігіне де кепілдік береді. Азаматтар өз мүлкін заңды кәсіпкерлікпен айналысу үшін еркін пайдалана алады. Сонымен бірге монополистік қызмет заңмен реттеліп, жосықсыз бәсекеге тыйым салынады.
Жеке меншік құқығы – азаматтың экономикалық дербестігі мен тұрақтылығының маңызды негіздерінің бірі. Ал оның Конституция деңгейінде бекітілуі әр адамның заңды мүддесін қорғауға бағытталған.
Осылайша, Конституция азаматтардың мүлкін иелену, пайдалану және мұраға қалдыру құқығын бекітіп қана қоймай, кәсіпкерлік бастамаларға да құқықтық негіз қалыптастырады.
