Семей қаласында дене шынықтыру мен спортты дамыту, тұрғындардың спортпен тұрақты айналысуына жағдай жасау бағытында жүйелі жұмыстар жүргізілуде. Жыл басынан бері қалада 120-ға жуық спорттық жарыс өткізіліп, бірнеше жаңа спорт нысаны пайдалануға берілді. Бұл туралы Өңірлік коммуникациялар қызметінде өткен брифингте Семей қаласының дене шынықтыру және спорт бөлімінің басшысы Қуат Исажанов мәлімдеді.
Қуат Исажановтың айтуынша, биыл қалада спорттың түрлі түрінен чемпионаттар, біріншіліктер, кубоктер, турнирлер мен әуесқойлар лигалары ұйымдастырылған. Олардың қатарында футзалдан «Әуесқойлар лигасы», қазақ күресінен «Наурыз батыры», баскетбол мен волейболдан қалалық жарыстар, сондай-ақ «Бірлік жүгірісі» шағын марафоны бар.
— Биыл қала күніне орай бірнеше ірі спорттық іс-шара ұйымдастырылды. Төртінші жыл қатарынан «SEMEY BATYRY» күштік экстрим жарысы өткізілді. Сонымен қатар алғаш рет «TUNGI RUN SEMEY-2026» түнгі марафоны ұйымдастырылып, оған 500-ге жуық қала тұрғыны қатысты. Қоян-қолтық ұрыстан өткен «ARB SEMEY» турниріне Өзбекстан, Қырғызстан және Ресей Федерациясының спортшылары қатысты, — деді Қуат Исажанов.
Бөлім басшысы спортшылардың облыстық жарыстарға қатысуына да тоқталды. 2026 жылғы күнтізбелік жоспарға сәйкес 70-тен астам облыстық жарысқа Семей қаласынан 1100-ге жуық спортшыны жіберу көзделген.
Биыл 17-22 мамыр аралығында Семейде Абай облысы әкімінің жүлдесіне арналған халық спорты ойындары өтті. Жарысқа облыстың 10 ауданы мен екі қаласының командалары қатысып, спорттың 10 түрінен бақ сынады. Нәтижесінде Семей қаласының құрамасы 245 ұпай жинап, жалпыкомандалық есепте бірінші орын иеленді.
Қала спортшылары халықаралық деңгейдегі жарыстарда да жоғары нәтижелер көрсетуде. Атап айтқанда, Вадим Чебардаков жасөспірімдер арасындағы конькимен жүгіруден әлем чемпионатында масс-старт сайысынан алтын медаль жеңіп алды. Ал Анастасия Беловодова командалық спринтте әлем чемпионы атанды.
Спорт саласындағы маңызды бағыттардың бірі – инфрақұрылымды дамыту. Биыл Водный және Бобровка кенттеріндегі дене шынықтыру кешендері, Ұшақтар кентіндегі дене шынықтыру кешені мен теннис орталығы пайдалануға берілді. Қазіргі уақытта Мирный кентінде «Самұрық-Қазына» қорының демеушілігімен жаңа спорт кешенінің құрылысы жүргізілуде. Нысанды жыл соңына дейін пайдалануға беру жоспарланған.
Сонымен қатар биыл «Спартак» стадионында UEFA талаптарына сәйкестікті қамтамасыз ету мақсатында ағымдағы жөндеу жұмыстары атқарылды. Футбол маусымында стадионда «Елімай» футбол клубының Премьер-лига ойындарымен қатар, UEFA Конференциялар лигасының іріктеу кезеңіндегі кездесуі де өткізілді.
Қазіргі таңда Семей қаласында Абай облысының дене шынықтыру және спорт басқармасына қарасты алты спорт мектебі мен екі спорт клубы жұмыс істейді. Онда 6000-нан астам бала мен жасөспірім спорттың түрлі түрімен шұғылданады.
2026 жылы қала тұрғындарының арасында дене шынықтырумен және спортпен жүйелі түрде айналысатындар үлесін 44,3 пайызға жеткізу жоспарланып отыр. Бұл бағыттағы жұмыстар жаңа спорт нысандарын ашу және бұқаралық спорттық іс-шараларды көбейту арқылы жүзеге асырылмақ.
