Semeytany.kz – Абай облысының әкімі Берік Уәли Жарма ауданындағы «Жарма Арасан» сауықтыру орталығында болып, кешеннің қызметімен танысты.
Шипажай буын, жүйке, тірек-қимыл жүйесі және құяң ауруларын емдеуге маманданған. Мұнда бір маусымда 600-700 адамға дейін қабылданады. 15 адам жұмыс істейтін нысанда 4 ғимарат бар.
Көл суының шипалық қасиеттері алғаш рет 1904 жылы дәрігер Дүйсенбі Қалматаев зерттеген. Жуырда медициналық университет мамандары көл суынан алынған сынамада Менделеев кестесіндегі көптеген элементтердің бар екенін анықтаған.
Кешен басшылығы 150 млн теңге көлемінде инвестиция салуды жоспарлап отыр. Осы ретте олар шипажайдың әлеуетін арттыру үшін облыс әкімінен қолдау сұрады.
Берік Уәли бұл бастаманы қолдап, әкімдік тарапынан қолдау көрсетілетінін айтты. Сондай-ақ инвестор заң аясында тиісті құжаттарын өткізген жағдайда, мемлекет тарапынан жұмсалған қаржының 10 пайызы қайтарылатынын атап өтті.
