Semeytany.kz – Абай облысының әкімі Берік Уәли Жарма ауданындағы ірі ауыл шаруашылық құрылымдарының бірі – «Нұркелді» кооперативінің жұмысымен танысты.
Мұхтар Тойқылды басқаратын шаруашылықта биыл 2 мың гектардан астам алқапқа дәнді, майлы дақылдар мен жоңышқа егілген. 800 гектар алқапта су үнемдейтін тамшылатып суару технологиясы қолданылуда. Жергілікті дихандардың айтуынша, бұрын бір құлақ су 1 гектарға жетсе, қазір 70-80 гектарға жетеді.
Кооператив заманауи техника сатып алып, он жылдық инвестициялық жобаны қолға алған. Қытайға экспортталатын өнімдермен қатар, шаруашылық құрамында жоңышқадан құрама жем өндіретін шағын зауыт та іске қосылған. Сондай-ақ көкөніс, картоп, қауын-қарбыз, жүгері мен күнбағыс өсірумен де айналысады.
Бүгінде шаруашылықта 35 адам тұрақты жұмыс істесе, маусымда жұмысшылар саны 100 адамға дейін жетеді. Болашақта қытайлық серіктестермен май зауытын ашу жоспарда бар.
Кәсіпкер облыс әкіміне жер көлемін 2000 гектардан 5000 гектарға дейін ұлғайту үшін қосымша телім беру туралы өтініш білдірді. Берік Уәли бұл ұсынысты қолдап, аудан басшылығына тиісті қолдау көрсетуді тапсырды.
