Әйгерім Сәрсенғали,
«Семей таңы»
Таяуда қала әкімі Айбек Кәрімов қалалық мәдениет үйінде «Дариға-ай» жастар театрының ұжымымен кездесті. Кездесу барысында өнерлі жастардың «Ақ кеме», «Ромео мен Джульетта» және желтоқсан оқиғасына байланысты қойылған қойылымдарының бейнежазбасын тамашалап, әртістердің жағдайларымен танысып, сауалдарына жауап қайтарды.
Театр өнері адамзат баласын тәр-биелейтін бірден-бір орта деп бағалайтын қала әкімі:
— Қаламыздағы ең маңызды мәселелердің бірі – мәдениет мәселесі. Жастардың мәдени деңгейлері төмендеп барады. Мәдениет болмаған жерде ұлттың болашағын елестету мүмкін емес. Бізді жастар арзанқол, талғамсыз мәдениетті қалай қабылдап алып жатыр деген мәселелер ойландырады. Сол мәдениеттілікке сіздер арқылы, шығармашылық зиялылар арқылы тәрбиелеу керек. Жастар санасына ұлттық тәрбиені сіңіруіміз керек. Сіздер тәрбиелемесеңіздер мына жастарды ешкім тәрбиелемейді, — деген Айбек Мүталапханұлы жас кездерінде театрға жиі баратындықтарын, өнер — мәдениеттің тұнып тұрған ортасы екендігін айтты. Театр өз қонақтарына көтеріңкі көңіл күй сыйлаумен қатар, терең ой тастауы керек деп санайтын Айбек Кәрімов студент шақтарында тамашалаған «Бесеудің хаты» әлі күнге дейін ойында екенін жасырмады.
— Көрерменді ешқашан алдай алмайсыздар. Шынайы қойылым болса, көрермендер өздері іздеп келеді. Сіздер «Ақ кемені» қойып жатырсыздар. Қырғыз халқының тұрмысынан сыр шерткен өте әдемі қойылым. Өзге ұлттың мәдениетін танытатын тамаша қойылым. Енді өзіміздің ұлттың тарихын трагедиялық тұрғыдан емес, ата-бабаларымыздан келе жатқан туындыларды сахналай отырып, жетістіктерімізді дәріптесеңіздер, қалған мұраларымызды насихаттап, жастар санасына сіңірсеңіздер екен дейміз,- деп аяқтады өз сөзін. Сондай-ақ, қала әкімі жастар театрының қоржыны тәрбиелік мәні бар, ұлттық болмыстың иісі аңқитын қойылымдармен толықтырса, нұр үстіне нұр болатындығын да айтып өтті.
«Дариға-айдың» репертуарында тәрбиелік мәні бар қойылымдардың мол қоры бар екендігін айтқан театр директоры Амангелді Бахтинов бүлдіршіндерге арналған қойылымдарымызды ұсынсақ, мектеп пен «Дариға-ай» арасындағы алтын көпір білім бөлімі болса деген ұсыныс білдірді. Театрдың сөз өнері бөлімінің жетекшісі Мейрамгүл Алепарова Семейдің атын асқақтатып жүрген жас актерлер екенін, олар мемлекеттік дәрежеде мадақтауға лайық екендігін айта келе, алдағы уақытта мүмкіндігінше өнерпаздар қатарын молайтуды, кадр мәселесін толықтыруды сұрады.
Театр басшылығы болашағынан үміт күттіретін өрен, дарынды режиссер деп бағалайтын Дәурен Төлеубаев жастарға тұрғын үй мәселесіне қатысты қолдау болса деген ой тастады.
Түрлі сауалдарды зерделеген қала басшысы алғашқы сауал төңірегінде білім бөлімімен тығыз байланыс орнату мүмкіндігі бар екенін, ұжым қызметкерлерінің жалақыларының аздығын, жалдамалы пәтерде тұратындығын жақсы білетіндігін, түсінетіндігін айта келе, материалдық жағдайлар қалыпқа келеді, рухани дүниені жоғалтпау керектігін айтып, кездесуді қорытындылады.
