Semeytany.kz – Абай Құнанбайұлының 180 жылдығына арналған онкүндік аясында Қазақстанның халық әртісі Майра Ильясованың жеке шығармашылық кеші өтеді. «Айналдым елім» атты бұл ән кеші Семей қаласында ұйымдастырылып отыр.
Өңірлік коммуникациялар қызметінде өткен брифинг барысында әнші бұл сапардың өзі үшін ерекше екенін атап өтті.
– Бүгін Абай елінде өнер көрсету – мен үшін зор мәртебе. Осыдан бір айдай бұрын Абай облысының әкімі Берік Уәли мырза арнайы шақырту жолдаған болатын. Біз мұнда 10 күнге келдік. Алғашқы концерт Үржар ауданындағы Таскескен ауылында өтеді. Жалпы, Абай облысының бірнеше ауданын аралап, тегін концерт береміз, – деді Майра Ильясова.
Кеш барысында Абай шығармаларына арналған әндер мен қазақ музыка өнерінің жауһарлары орындалады. Концертке Қазақстанның еңбек сіңірген әртісі, дәстүрлі әнші Бисара Макенова, “Жас Қанат – 2016” байқауының жеңімпазы Парасат Отан және “Әдемі-ай” дуэті де қатысады.
– Бұл өңір мен үшін өте қымбат. Себебі өнер жолындағы алғашқы қадамдарымды дәл осы жақтан бастаған едім. Сондықтан туған жерге табан тіреп, халқыммен қауышып отырғаныма қуаныштымын. Бүгін Майра Ильясованың шығармашылық кешіне арнайы келіп отырмын, – деді Бисара Макенова.
Гастрольдік сапар шеңберінде концерттік бағдарлама 3–6 тамыз аралығында Үржар, Аягөз, Жарма және Жаңасемей аудандарында жалғасады.
