Semeytany.kz – Абай атындағы театр сахнасында Қазақстанның халық әртісі Майра Ильясованың «Айналдым елім» атты шығармашылық кеші аншлагпен өтті. Семейліктер сүйікті әншісін сағынып, залды лық толтырды.
Кеш басталмас бұрын өнер иесі жерлестеріне деген ықыласын жеткізді.
– Шаршап келген халыққа бір сәтке болсын жақсы көңіл-күй сыйласақ екен деймін. Ауыл халқы да бізді алыстан емес, жақыннан көрсін. Абай тойының орны ерекше. Елге келіп, өз халқыңа қызмет ету – өнер адамы үшін үлкен мәртебе, – деді Майра Ильясова.
Кеш көрерменмен еркін байланыс орнаған ерекше форматта өтті. Әнші залдағы көрермендерге Абай туралы сұрақ қойып, ақын әндерін үздік орындаған қатысушыларға естелік сыйлықтар табыс етті.
– Айтумен шектелмей, Абайша ойлауға тырысайық. Ұлы мұраны түсініп, дәріптей білсек – мақсатымыздың орындалғаны, – деді халық әртісі.
Кеш барысында Қазақстанның еңбек сіңірген әртісі, дәстүрлі әнші Бисара Макенова, “Жас Қанат – 2016” байқауының жеңімпазы Парасат Отан және “Әдемі-ай” дуэті өнер көрсетті.
Айта кетейік, Абай Құнанбайұлының 180 жылдығына арналған онкүндік мерейтойлық бағдарламалар өңірде жалғасып жатыр. Барлық мәдени іс-шаралар көрермендер үшін тегін ұйымдастырылуда.
Гастрольдік сапар шеңберінде «Айналдым елім» концерті 3–6 тамыз аралығында Үржар, Аягөз, Жарма және Жаңасемей аудандарында өтеді.
