Интернеттің ел аумағында кеңінен қолжетімді болуы – қазіргі таңда Қазақстанның цифрлық дамуындағы стратегиялық маңызға ие мәселелердің бірі. Мемлекет басшысы Қасым-Жомарт Тоқаев цифрлық теңсіздікті жою, әрбір азаматты сапалы интернетпен қамтамасыз ету қажеттігін бірнеше рет айтқан болатын. Облыстық цифрлық технологиялар басқармасы осы бағытта бірқатар ауқымды жобаларды іске асырып келеді. Бұл туралы облыс әкімі Берік Уәлидің төрағалығымен өткен кеңейтілген аппараттық кеңесте Цифрлық технологиялар басқармасының басшысы Абзал Серікұлы мәлімдеді.
Еркежан ҚАЙСА,
«Semeı tańy»
Абзал Серікұлының айтуынша, бүгінде облыстағы 252 ауыл сымды және мобильді интернетпен қамтамасыз етілген. 93 елді мекенде талшықты-оптикалық байланыс желісі бар. 233 елді мекенге талшықты-оптикалық байланыс желісін тарту қажет.
«Қолжетімді интернет» ұлттық жобасы аясында еліміз бойынша 2991 ауылдық елді мекенді жоғары жылдамдықтағы интернетпен қамту көзделген. Бұл тізімде облысымыздың 179 ауылдық елді мекені де бар. Жоба аясында 2027 жылға қарай өңірдегі ауылдық елді мекендерді интернетпен қамту көрсеткіші 96 пайызға дейін жеткізіледі.
Сонымен қатар облыс аумағынан өтетін республикалық және облыстық маңызы бар автожолдарда интернет пен мобильді байланысқа қолжетімсіз учаскелер бар. Ұлттық жоба аясында республикалық маңызы бар автожолдар бойында 40 антенна-діңгек құрылысын салу көзделген. 2027 жылдың соңына дейін барлық негізгі жолдар мобильді интернетпен толық қамтылатын болады. 2023 жылы облыста шалғай елді мекендерді сапалы интернетпен қамтамасыз ету мақсатында Жол картасы бекітілді. Осы Жол картасы шеңберінде жергілікті әкімдіктер мен жеке инвестиция есебінен 23 антенна-діңгек құрылысын салу жоспарланған. Оның ішінде 15 антенна-діңгек пайдалануға берілді, 4-еуі жеке қаржы есебінен салынды. Қалған 8 ауылда құрылыс және жобалау жұмыстары жүргізілуде.
Аймақ басшысы жиында облыстағы туристік орындардағы интернет сапасын жақсартудың маңызын атап өтті. Цифрлық технологиялар басқармасына байланыс операторларының қызметін қатаң бақылауға алып, сапасыз қызмет үшін заң аясында шара қолдануды, салалық министрлікпен бірлесе жұмыс жүргізіп, нәтижесін ай сайын баяндап отыруды тапсырды.
