Семейде ұлт руханиятының темірқазығына айналған дара тұлға — хакім Абай Құнанбайұлының 180 жылдығына арналған «Өлең — сөздің патшасы, сөз сарасы» атты халықаралық жыр мүшәйрасы өз мәресіне жетті.
Ұлы ойшылдың шығармашылық жолын жалғап, оның рухани-эстетикалық әлемін бүгінгі жас буынға насихаттауға арналған шығармашылық сайысқа еліміздің әр өңірінен және Қырғызстан, Түркия, Моңғолия елдерінен 80-ге жуық ақын өз өлеңдерін ұсыныпты.
Жүзден жүйрік, мыңнан тұлпар болып танылған ақындар Ә.Бөкейханов университетінде өткен қорытынды кеште бас қосты. Жыр додасына Қазақстан Республикасы Мемлекеттік сыйлығының лауреаты, ақын Тыныштықбек Әбдікәкімұлы, ҚР мәдениет саласының үздігі, күйші Дүйсебай Шаштайұлы, республикалық айтыстардың жеңімпазы ақын Серікзат Дүйсенғазин, Халықаралық «Алаш» әдеби сыйлығының иегері, ақын Ербол Алшынбай төрелік етті.
— Мүшәйра шарты бойынша, ақындар екі өлеңнен ұсынды. Бірі — Абайға арнау өлең, екіншісі еркін тақырыпта. Жыр сайысына қатысқан ақындардың көбі — елімізге белгілі азаматтар. Қаламы қалыптасқан ақындар болғандықтан, олардың ішінен 8-ін ғана іріктеп алу оңай болған жоқ. Осалы жоқ. Әр ақынның поэзияда өз стилі, өз бағыты бар. Жас ақындар тіпті бөлек бағытта жазады. Барлық дүниені ескердік деп ойлаймын. Бүгінгі қазақ поэзиясы көркемдігі жағынан әлемдік деңгейдегі поэзиядан еш кем емес. Оны талантты жас ақындарымыз жалғастырып келеді,- дейді әділ қазылар алқасының мүшесі Серікзат Дүйсенғазин.
Мүшәйраға қатысқандардың басым көпшілігі 20-30 жас аралығындағы жастар екен. Сонымен қатар Ринат Зайытов, Шалқарбай Ізбасар, Ұларбек Нұрғалым, Дәулет Сметов сынды аға буын ақындар да өлеңдерін ұсыныпты.
Поэзия кешінде ұлы ақынға арналған үздік шығармалар оқылды.
Мүшәйра қорытындысы бойынша, бас жүлдені Ұмтыл Зарыққан (Астана қаласы) жеңіп алып, 1 000 000 теңге көлеміндегі сыйақыға ие болды. I орын Нұрбек Кеңесбайға (Астана қаласы, 500 000 теңге), II орын Бауыржан Жақыпқа (Алматы қаласы, 300 000 теңге), III орын Дәурен Тілеуханға (Түркістан қаласы, 200 000 теңге) бұйырды.
Сондай-ақ Әлия Іңкәрбек (Алматы қаласы, 100 000 теңге) «Жылы жүрек» аталымына, Қуаныш Оспан (Көкшетау қаласы, 100 000 теңге) «Ерекше қонақ» аталымына, Бауыржан Игілік (Семей қаласы, 300 000 теңге) «Көрермен көзайымы» аталымына, ал Ерлан Аманғожа (Павлодар қаласы, 200 000 теңге) «Жас Абай» арнайы жүлдесіне ие болды.
— Ұлы ақынның мерейтойы аясында ұйымдастырылған жыр бәйгесіне Астана қаласынан келдім. Ақынның нұр сипатына, дидарына ең жақын қауым ақындар, ғалымдар, сөз зергерлері деп білемін. Абайдың тойына қатысу – үлкен мәртебе. Бас жүлде иеленіп жатырмын. Өте қуаныштымын. Тойымыз құтты болсын!- дейді байқау жеңімпазы Ұмтыл Зарыққан.
Шығармашылық сайыс Семей қаласы әкімдігі, мәдениет және тілдерді дамыту бөлімі, Жазушылар одағының Абай облысы филиалының ұйымдастыруымен өтті.
Кәмшат СЕРІКҚЫЗЫ
