Кеш барысында дәстүрлі ән мен күй, терме мен би, театрландырылған көріністер және заманауи өнер туындылары көрермен назарына ұсынылды.
Айта кетерлігі, маусым айында төл мәдениетімізді, ұлы өнерімізді дәріптеу, көркемөнерпаздар шығармашылығын көпшілікке насихаттау мақсатында облыстық көркемөнерпаздар байқауы ұйымдастырылған болатын. Сол байқауда бірінші орынды жеңіп алған Абай ауданының өнерпаздары, сондай-ақ үздік деп танылған Аягөз бен Үржар аудандарының әншілері, бишілері мен күйшілері өнер көрсетті.
— Бұл концерт жарқын мәдени шара ғана емес, сонымен бірге халық өнерін қолдауға бағытталған маңызды қадам болды. Осындай кештер арқылы жаңа есімдер жарқырап, ұрпақтар арасындағы рухани сабақтастық тереңдей түседі. Мәңгілік мұрамыз – халық өнері жалғасын табады, — деді Абай облысының мәдениет, тілдерді дамыту және архив ісі басқармасының өкілдері.
Аудан өнерпаздарының концерті ел ішіндегі өнер иелерін қанаттандырған, өңірлік мәдениеттің дамуына серпін берген, жүректерге жылу, саналарға сәуле сыйлаған ерекше мәдени оқиға ретінде есте қалды. Бұл өнердің сабақтастығын, халық шығармашылығының өміршеңдігін айқындаған мазмұнды кеш болды.
Қала қонақтары мен тұрғындары әсем әнге, күмбірлеген күйге, мың бұралған бишілердің өнерлеріне тәнті болып, бір серпіліп қайтты.
