Semeytany.kz — Абайдың 180 жылдығына арналған онкүндік аясында Семей қаласындағы Абай атындағы театрда өткен «Адамзаттың Абайы» республикалық ақындар айтысы өз мәресіне жетті. Додаға еліміздің түкпір-түкпірінен келген он екі айтыскер қатысып, сөз өнерінің үздіктері бақ сынады.
Айтысты белгілі ақын, Мәжіліс депутаты Аманжол Әлтай жүргізді. Марапаттау рәсімінде облыс әкімі Берік Уәли айтыстың дәстүрлі түрде өткізілуі керегін айтып, оны республикалық күнтізбелік тізімге енгізу жөнінде ұсыныс жасады.
Қорытынды бойынша үшінші орынға Әсем Ережеқызы мен Жансая Мусина (1 млн теңге), екінші орынға Айбек Қалиев пен Мейірбек Сұлтанхан (1,5 млн теңге) ие болды. Бірінші орын алған Рүстем Қайыртайұлына 3 млн теңге берілсе, бас жүлде — автокөлік қарағандылық Мақсат Ақановқа бұйырды. Қалған ақындарға 500 мың теңгеден, арнайы жүлделер Мұхтар Ниязов пен Қуандық Кенжебекұлына табысталды.
Аймақ басшысы айтысқа төрелік еткен қазылар алқасының төрағасы Жүрсін Ерманға, қазылар мүшелері Сауытбек Абдрахманов пен Төлеген Жанғалиевке, сондай-ақ айтыс жүргізушісі Аманжол Әлтайға арнайы Абай шапаны, тақиясы және мерейтойлық кілемшені сыйға тартты.
