Semeytany.kz – Абай Құнанбайұлының 180 жылдық мерейтойы аясында Астана қаласында 140-тан астам іс-шара өтеді. Соның ішінде 8-11 тамыз аралығында ақынның туған жеріне 25 адамнан құралған экспедиция ұйымдастырылмақ. Құрамында белгілі тарихшылар, қоғам қайраткерлері, депутаттар, қоғамдық кеңес мүшелері, журналистер мен блогерлер бар. Бұл жайында Астана қаласы Тілдерді дамыту басқармасы басшысының міндетін атқарушы Досжан Исабек Орталық коммуникациялар қызметінде өткен брифингте мәлімдеді.
Спикердің айтуынша, 10 тамыз күні елордадағы Абай ескерткішіне гүл шоқтары қойылады. Сондай-ақ, сағат 19:00-де «Керуен» ойын-сауық орталығының жанында «Домбыра party» кеші өтеді. Онда қатысушылар қазақтың қара домбырасымен Абайдың әндерін орындап, «Қара сөздерін» оқиды. Мақсат – ұлы ойшылдың өнерін дәріптеу және ұлттық өнерді насихаттау.
Мерейтой аясында Роза Бағланова атындағы №2 балалар музыка мектебінің оқушылары қалалық жалпы білім беретін мектеп оқушыларымен бірге «Ән шашу» ұйымдастырады. Шарада 5 мыңнан астам бала ақынның бір әнін орындайды. Сонымен қатар, студенттерден құралған «Sintez» театры «Абай 45» атты қойылым қояды.
