Semeytany.kz – Абайдың 180 жылдық мерейтойы аясында Абай ауданы Қарауыл ауылы маңындағы Қарауылтөбеде «Абай елі» стелласы салтанатты түрде ашылды. Шараға облыс әкімі Берік Уәли мен аудан ақсақалдары қатысты.
Мерейтой қарсаңында ескерткішке апаратын баспалдақ салынып, аумағы абаттандырылды. Стелла төрт тұғырдан тұрады: алғашқысы – «Өлең сөздің патшасы, сөз сарасы» ұғымын бейнелейтін қауырсын қалам, екіншісі – ел қорғаған батырлар мен бүгінгі ерлердің айбары саналатын қалқан, үшіншісі – Абайдың ән-жырының өзегі домбыра, төртіншісі – ұлыларды дүниеге әкелген ақ бесік. Шарықтау шегі – ғаламшар мен оны айнала қалықтаған тыныштық пен тұрақтылықтың символы қарлығаш бейнесі.
Аудан кәсіпкерлерінің демеушілігімен тұрғызылған ескерткіштің авторы – мүсінші Нұрбол Қалиев. Аймақ басшысы Берік Уәли бұл нысан Қарауылдың көркін арттырып қана қоймай, қонақтарға ауылдың сұлулығын биіктен тамашалауға мүмкіндік беретін ерекше орынға айналатынын атап өтті.
