Semeytany.kz – Абай облысындағы ұлы ақынның 180 жылдық мерейтойына арналған онкүндік шаралар ақынның туған жері – Абай ауданында қорытындыланды. Қарауылтөбеде өткен мерекелік күнде ұлттық спорт түрлерінен жарыстар ұйымдастырылды.
«Жеті қазына» фестивалі аясында жорға жарысы, 16 шақырымдық топ бәйге, 25 шақырымдық аламан бәйге өтті. Қазақ күресінен «Түйе палуан» (90 келіден жоғары) мен «Өгіз палуан» (74 келіге дейін) анықталды. Жүлдегерлерге 90 бас жылқы мен 10 автокөлік сыйға берілді.
Еліміз бойынша алғаш рет тоғызқұмалақ сайысы мен 180 шақырымдық ультрамарафон жеңімпаздарына автокөлік табысталды. Семей – Қарауыл бағытын 19 сағат 9 минутта жүгіріп өткен батысқазақстандық Баубек Ильясов жеңімпаз атанды. Тоғызқұмалақта шымкенттік Ғалымжан Темірбаев, «Түйе палуанда» маңғыстаулық Нұрдәулет Жарылғапов, «Өгіз палуанда» алматылық Жігер Еркінұлы топ жарды. «Топ бәйгеде» Алматы облысының, «Аламан бәйгеде» Павлодар қаласының, жорға жарысында Қырғызстан жүйрігі жеңіске жетті.
Облыс әкімі Берік Уәли жарыс жеңімпаздарын марапаттап, онкүндік аясында тек тойлауға емес, рухани, зияткерлік, спорттық бағыттағы іс-шараларға басымдық берілгенін атап өтті. Онкүндік “Желсіз түнде жарық ай” гала-концертімен түйінделді.
