Елбасының барлық деңгейдегі әкімдердің халыққа есеп беруі жөніндегі Жарлығына сәйкес, Тарбағатай ауданының әкімі Ділдабек Оразбаев өңірдегі он жеті ауылдық округтің орталықтарында болып, ел алдында есеп беру жиналыстарын өз деңгейінде өткізді. Жыл басындағы жауапты жиындарда аудан басшысы атқарыл—ған жұмыстарды баяндады. Халықтың әлеуметтік—тұрмыстық ахуалын жақсарту бағытында қолға алынып, жүзеге асырылып жатқан игілікті істер сараланып көрсетілді.
{jcomments on}Ауданның әлеуметтік-экономикалық дамуының барлық салаларында өткен жылдың тиісті кезеңімен салыстырғанда әжептәуір ілгерілеушілік бар екеніне көз жеткізген жұртшылық өкілдері ой-пікірлерін ортаға салып, атқарылған жұмысқа көңілдері толатынын айтты. Өңір тұрғындары аудан әкіміне өздерін толғандырып жүрген сұрақтарын қойып, оған нақты да тұшымды жауаптар алды. Сөйтіп, бүкпесіз әңгімелер арқылы көпшіліктің көкейінде жүрген көптеген мәселелердің түйіні шешілгендей болды. Аудан орталығы Ақсуатта өткен қорытынды жиынға Шығыс Қазақстан облысы әкімінің орынбасары Нұрымбек Сақтағанов арнайы келіп қатысып, сөз сөйледі.
Ауданның басқа ауылдарындағы сияқты, Ақсуатта да жылдық жиынға халық көп жиналды. Аудан әкімі өткен жылғы әлеуметтік-экономикалық дамудағы жетістіктерді, ауданның негізгі табыс көзі болып саналатын ауылшаруашылығы саласына үлкен мән беріліп отырғанын, соның нәтижесінде мал шаруашылығы мен егіншілікті жарыстыра дамытып, айтулы табыстарға қол жеткізілгенін мәлімдеді. Суармалы егістіктің көлемін арттыру, асылтұқымды мал басын көбейту, мал бордақылау алаңдарын жабдықтап, егістен мол өнім алудың сыннан өткен амалы – тамшылатып суару жүйесін қолдану тәжірибесі таратылып, құс өсіретін фермалар құру, сүт цехтарын ашу жоспарлары рет-ретімен орындала бастағаны мәлім болды. Өткен жылы ғана ауданда үш мектеп, үш ауылдық аурухана жаңадан салынып, оншақты балалар бақшасы іске қо-сылғаны, барлық ауылдардағы мәдениет ошақтары күрделі жөндеуден өтіп, жолдар жөнделіп, халықты сапалы ауызсумен қамту жұмысы мықтап қолға алынып, ауыл еңбекшілерінің басқа да толып жатқан ұсыныс-тілектері орындала бастағаны көңілдерге қуаныш сезімін ұялатты.
Жиында халықты ауылды жерде тұрақтандыру ондағы еңбек және тұрмыстық жағдайларға да байланысты екендігі де айтылды. Жерге иелік ету, кетпен-күрек ұстап, суармалы жерлерді игеру мақсатымен оңтүстік өңірлерден көшіп келіп жатқан қандастарымызды түсіністікпен қабылдап, жылы шыраймен қарсы алу мәселесі де айтылмай қалмады.
Ақсуаттағы жиында облыс әкімінің Тарбағатай ауданындағы қоғамдық кеңесшісі Амантай Сәметов, Ақжардағы «Балауса» балабақшасының меңгерушісі, аудандық мәслихаттың депутаты Алмагүл Құсайынова, зейнеткер Тұрсынхан Жүнісов, аудандық ардагерлер кеңесінің төрағасы Мұқан Сахариев және басқалар ой-пікірлерін ортаға салды.
Хамза СӘТИЕВ,
«Семей таңы»
