Жеңіс мерекесі — аға ұрпақтың ерлігін мәңгілікке ел жадында сақтауға арналған ерекше орны бар мереке. Қайнар орталықтандырылған кітапхана жүйесі ұжымы Жеңістің 70 жылдығы қарсаңында оны айтарлықтай іс-шаралармен атап өту үшін жұмыстар жүргізуде. Соның бірі «Жеңістің 70 жылдығына — 70 кітап оқу» тақырыбында оқырмандар акциясын бастап кетті.
{jcomments on}Бұл шараның мақсаты — көпшілікке соғыс жылдары тақырыбын қамтыған әдебиеттерді насихаттап, өскелең ұрпақ бойына патриоттық рухты қалыптастыру, майдангерлер танытқан қаһармандық пен қайсарлықты, тылда қажырлы еңбек еткен жандардың ерен істерін үлгі ету. Акцияға қатысуға ниет білдірушілер осы жылдың 12 қаңтарынан 5 мамырға дейін 70 танымдық және көркем әдебиет оқып шығуы керек. Рымжан Малгаждарқызы, Жақан Бейсекеев, Оразай Ахмадиева белсенділік көрсетуде. Сондай-ақ Халида Токтиева кітапханаға жиі келіп, кітаптар алып, осынау акциядан сырт қалмауда.
Аталмыш шараның кітапхана оқырмандарының санын арттырып, көпшілікті, жастарды көркем әдебиетке қызықтыруда, білім көкжиегіне молайтып, жан дүниесін байытуда берері мол деп білеміз. Әр ауылдағы кітапханашылар да бұл акцияны ұйымдастырып, өткізуге аянбай тер төгуде.
Қазима ҚАЖЫБЕКОВА,
«Семей таңы»
