Semeytany.kz – Абай облысының әкімі Берік Уәли арнайы қорғаныс аяқ киімін шығаратын өндірістік-қойма кешені мен «Техноавиа-Қазақстан» ЖШС-нің «Швейная фабрика» филиалының жұмысымен танысты. 2014 жылы құрылған компанияның бұл бөлімшесі 2025 жылы іске қосылып, бүгінде 140 адамды тұрақты жұмыспен қамтып отыр. Фабрика арнайы, медициналық және корпоративтік киімдер шығарып, жылына 140 мыңға дейін дайын өнім өндіреді.
Былтыр кәсіпорында ауқымды жаңғырту жүргізіліп, жаңа цехтар мен қоймалар ашылды. Германия мен Ресейден заманауи автоматтандырылған жабдықтар әкелініп, 220-дан астам тігін машиналары мен бу генераторлы үтіктеу қондырғылары орнатылды. 2025–2029 жылдары тігін цехтарын қайта жабдықтап, өндіріс көлемін арттыру жоспарланып отыр. Сонымен қатар, алдағы үш жылда аяқ киім фабрикасын іске қосу көзделген.
Аймақ басшысы кәсіпорынның экономикалық маңызын атап өтіп, жергілікті өнім сапасын жоғары бағалады. Оның айтуынша, тігін және жеңіл өнеркәсіп – жаңа жұмыс орындарын ашып, өңірдің индустриялық әлеуетін арттыратын маңызды сала, әрі әкімдік тарапынан қолдау жалғаса береді.
