Semeytany.kz – Абай облысында Қазақстан халқы Ассамблеясының Республикалық Аналар кеңесінің бастамасымен «Салауатты сана» жобасы жүзеге асырылып, 2 032 адам қатысқан 58 іс-шара өткізілді. Бұл туралы Аналар кеңесінің мүшесі Айжан Қуанышбаева хабарлады.
Жоба нашақорлық, құмар ойынға тәуелділік, тұрмыстық зорлық-зомбылық, вандализм және ысырапшылдық сынды бес әлеуметтік дертпен кешенді түрде күресуді көздейді. Аналар кеңестері мемлекеттік органдармен және қоғамдық ұйымдармен бірлесіп, ақпараттық-түсіндіру, сараптамалық және профилактикалық жұмыстар жүргізуде.
Айжан Қуанышбаеваның айтуынша, елімізде 400 мыңға жуық адам құмар ойынның құрбанына айналған. 200 мыңға жуық жасөспірім букмекерлік кеңселерде басқа адамдардың атымен бәс тігеді. Ажырасулардың 40 пайызы да лудоманияға байланысты болса, есірткіге тәуелділердің саны ресми есептегіден әлдеқайда көп.
Мемлекет басшысы Қасым-Жомарт Тоқаев Ассамблеяның ХХХІІІ сессиясында бұл мәселелермен түбегейлі күресу қажеттігін атап өткен. Сол тапсырма негізінде «Мәдениетті ана – мәдениетті ұлт» жобасы аясында «Салауатты сана» бастамасы іске қосылды.
