Елбасы Нұрсұлтан Әбішұлы Назарбаев өзінің «Нұрлы жол – болашаққа бастар жол» атты Жолдауында жаһандық экономикалық дағдарыстың кезінде даму көрсеткіштерін сақтай отырып, еліміздегі ахуалдың қиындауының алдын алу шаралары туралы айтқан болатын. «Бүгін менің тапсырмам бойынша Үкімет белсенді жұмысқа кірісіп кетті. Біз 2015 жылға арналған республикалық бюджеттің параметрлерін қайта қарадық. Бұл дұрыс, өйткені біздің экспорттық шикізат ресурстарына бағаның құлдырауы бюджеттің кіріс бөлігіне қаржы түсуін төмендетуге алып келуде. Бірақ, соған қарамастан, Үкімет алдына оңай емес, алайда, нақты міндет – барлық әлеуметтік міндеттемелерді толық көлемінде қамтамасыз ету міндеті қойылып отыр», — деді Елбасы. Осы орайда атқарушы билік дағдарыс кезінде кәсіпорындарда жұмыс орындарын сақтау шараларын қолға алуда. Өткен жұма күні қала әкімі Айбек Кәрімов пен өндіріс орындары мен өнеркәсіп ошақтары басшылары арнайы меморандумға қол қойды.
{jcomments on}Жиын барысында алғашқы болып сөз алған қала әкімі Айбек Кәрімов дүниежүзілік экономикалық дағдарыс кезінде жергілікті атқарушы билік пен кәсіпорындар жетекшілері арасында жұмыс орындарын сақтап қалу бойынша келісім жасаудың үлкен мәнге ие екендігін атап өтті.
— Шағын және орта кәіпорындарда жұмысшылар алдындағы кепілдіктер мен еңбек құқықтарын қамтамасыз ету, өндірістік процесті тиісті қалпында сақтау туралы арнайы меморандумдарға қол қойылды. Бұл бағыттағы жұмыстар жалғасын тауып келеді. Сондай шаралардың бірі – жұмыс орындарын қысқартпау және еңбек қатынастарын реттейтін заңнаманың орындалуын қамтамасыз ету үшін бүгін біз қаламыздың бірнеше кәсіпорындарының басшыларымен арнайы меморандумға қол қоятын боламыз, — деді Айбек Мүталапханұлы.
Қала әкімшілігімен келісім жасасу үшін жиынға «Семей цемент зауыты» ЖШС бас директоры Геннадий Каменев, «Прииртыш бройлер құс фабрикасы» ЖШС-нің бас директоры Бейсенғазы Тастекеев, Семей азбест-цемент бұйымдары зауытының басшысы Константин Бужилов, «Ай-ар» ЖШС бас директоры Ербол Қабдрахманов, «Семей құю-механикалық» ЖШС-нің директоры Борис Козырев шақырылған болатын. Тараптар дағдарыс кезінде жұмыс орындарын қысқартпау бойынша меморандумға қол қойды. Келісім жасасу рәсімі аяқталғаннан кейін, қала басшысы жұмыс орындарын сақтап қалу жөніндегі бастамаға қолдау білдіріп, атсалысуға ниет танытқан азаматтарға алғысын айтты.
— Мен бүгін меморандумға қол қойған кәсіп-орындардың басшыларына өндірген өнімдерінің сұранысқа ие болуын тілеймін. Ең бастысы, шығарылған дүниелеріңіздің бәсекеге қабілеттілігі жоғары болсын. Және осы тауарларды жасап шығаратын жұмысшыларыңызды қысқартып, жалақыларын уақтылы төлеп отыруларыңыз шарт, — деді Айбек Кәрімов.
Өз кезегінде кәсіпорын басшылары да қала әкіміне қажетті кездерде қолдау білдіріп келе жатқандығы үшін алғыстарын білдірді. Дағдарыс кезінде жұмыс орындарын сақтап қалу бойынша атқарылатын шараларға атсалысуға әзір екендіктерін жеткізді. Мәселен, «Семей бройлер құс фабрикасы» ЖШС-нің бас директоры Бейсенғазы Тастекеев:
— Әрине, бүгінгі меморандумға қол қою дегеніміз — жай ғана рәсім емес. Бұл – үлкен жауапкершілік. Себебі біз кәсіпкерлер қазіргі экономикалық дағдарыстың өте шарықтап тұрған шағы екенін білеміз. Бір экономикалық одақта болғандықтан, солтүстіктегі көршіміздің аумағындағы ахуалы бізге де өз әсерін тигізетіні түсінікті. Дегенмен де қазіргі таңда кәсіпорын басшылары келісімге қол қою арқылы кепілдік беріп отырмыз. Өз өндірісім туралы айтатын болсам, бұл өндіріс – аяғына нық тұрған өндіріс. Қазіргідей қиыншылықтарға төтеп бере алатын өндіріс. Әсіресе осында еңбек етіп жатқан мамандардың, ұжымның әлеуметтік жағдайына қатысты ешқандай кемшілікті болдырмауға кепілдік береміз.
Жұмыспен қамту және әлеуметтік бағдарламалар бөлімінің басшысы Қанатжан Төлесбаев қала кәсіпорындарының 2007 — 2009 жылдардағы дағдарыс кезінде жергілікті атқарушы билікпен жұмыс орындарын сақтау, жұмысшылар алдындағы кепілдіктер мен еңбек құқықтарын қамтамасыз ету бағытында бірлесе жұмыс істеп, бұл бағыттағы шараларға жан-жақты қолдау білдіргендерін айта келе, осы жолы да қол қойылған меморандумның барлық шарттарын лайықты деңгейде орындайтындықтарына сенім білдірді.
Мирас ҚҰСАЙЫН,
«Семей таңы»
