Бүгінгі таңда қоғам алдында тұрған маңызды міндеттердің бірі – жастарды радикалды идеологиялардан сақтау және олардың бойында рухани иммунитет қалыптастыру. Бұл ретте діни ағартушылық жұмыстың маңызы зор. Семей қаласында осы бағытта жүйелі шаралар жүзеге асырылып келеді.
Қазақстанның рухани және мәдени кеңістігінде деструктивті діни ағымдардың таралуы өзекті мәселелердің бірі болып отыр. Мұндай ағымдар радикалды идеяларды насихаттап, әсіресе жастарды өз қатарына тарту арқылы оларды ұлттық және рухани құндылықтардан алыстатып, қоғамдағы тұрақтылыққа қауіп төндіреді.
Семей қаласында діни экстремизмге қарсы күрес Қазақстан заңнамасына сәйкес жүзеге асырылуда. Құқық қорғау органдары радикалды ұйымдардың қызметіне қатаң бақылау жасап, заңсыз діни әдебиеттерді таратушылар мен экстремистік идеяларды насихаттаушыларға қарсы шаралар қабылдап келеді. Сонымен қатар тұрғындардың құқықтық сауатын арттыру мақсатында ақпараттық науқандар ұйымдастырылуда.
Бұл ретте діни ағартушылық жұмыстары ерекше рөл атқарады. Мектептер мен университеттерде семинарлар мен дәрістер өткізіліп, дәстүрлі ислам мен басқа да діндердің тарихы мен құндылықтары таныстырылады. Ақпараттық материалдар таратылып, теле-радио арқылы арнайы бағдарламалар көрсетіледі.
Мешіттерде имамдар, дінтанушылар мен психологтер бірігіп, жастардың діни сауаттылығын арттыруға бағытталған тренингтер мен дөңгелек үстелдер өткізуде. Бұл – жастарды теріс ағымдардың ықпалынан қорғаудың тиімді жолдарының бірі.
Сондай-ақ деструктивті ағымдардың ықпалына түскен азаматтарды оңалту бағытында кешенді бағдарламалар жүзеге асырылады. Оларға психологиялық кеңес беру, кәсіби білім беру және әлеуметтік бейімдеу арқылы қоғамға қайта бейімделу мүмкіндігі ұсынылады. Бұл істе мемлекеттік және қоғамдық ұйымдар бірлесе жұмыс атқарады.
Діни экстремизмнің алдын алу жұмыстарын қоғамдық ұйымдар мен жергілікті әкімдіктер де белсенді жүргізуде. Олар жастарды спорттық, мәдени және шығармашылық шараларға тарту арқылы теріс ықпалдан сақтап қалуға күш салуда.
Семей қаласында теолог мамандардың қатысуымен тұрақты түрде түсіндіру жұмыстары жүргізіледі. Мамандар теріс ағымдардың ықпалына түскен азаматтармен жеке кездесулер өткізіп, дәстүрлі исламның мәні мен мазмұнын түсіндіреді. Осындай жұмыстардың нәтижесінде көптеген азаматтар дәстүрлі дінімізге қайта оралуда.
Бүгінде облыс аумағында 168 діни бірлестік тіркелген, оның ішінде 134-і мұсылмандық, 12-сі православие, 5-еуі католик, 17-сі протестанттық бағытта. Сонымен қатар 19 намазхана мен 20 діни атрибутика және әдебиеттер сататын орын жұмыс істейді. ҚР Әкімшілік құқықбұзушылық кодексінің 490-бабына сәйкес, мұндай орындар тіркеуден өтіп, арнайы рұқсат алғаннан кейін ғана жұмыс істей алады.
Қазіргі таңда облыс бойынша 11 ақпараттық-түсіндіру тобы жұмыс істесе, оның екеуі Семей қаласында. Бұл топтар жастар, студенттер мен оқушылар арасында жат ағымдардың зияны жөнінде заңдық және діни тұрғыда кеңес береді.
Облыстық дін мәселелерін зерттеу орталығының бас теологі, дінтанушы Мақсат Дүйсенбекұлының сөзіне сүйенсек, қаладағы мектептер мен жоғары оқу орындарында дәстүрлі исламның қоғамдағы орны жайлы дәрістер оқылып, әлеуметтік желілерде теріс ағымдарға қарсы бейнероликтер мен ақпараттық материалдар таратылады.
– Қазіргі таңда Семейде бұл іске қоғамдық ұйымдар да белсенді араласуда. Олар теолог мамандарды шақырып, жастармен кездесулер, семинарлар мен тренингтер ұйымдастырады. Сонымен қатар жастар арасында спорттық және мәдени шаралар өткізіп, оларды жат ағымдардың ықпалынан қорғауға үлес қосып келеді, – дейді дінтанушы Мақсат Ботаханов.
Құқық қорғау органдары да бұл бағыттағы жұмыстарды күшейтіп отыр. Арнайы бөлімшелер профилактикалық жұмыстармен айналысып, заңсыз діни ұйымдардың қызметін бақылауға алып, олардың таралуына жол бермейді.
Бұл тұрғыда отбасының да рөлі ерекше. Баланың бойына рухани құндылықтар мен адамгершілік қасиеттерді сіңіру – ата-ананың басты міндеті. Имандылыққа негізделген ұлттық тәрбие ғана жас ұрпақты жат идеологиялардан қорғай алады.
Қоғам да бұл істен тыс қалмауы тиіс. Жастарға дұрыс бағыт беру, рухани дамуына жағдай жасау – барша әлеуметтік институттардың ортақ жауапкершілігі. Жұдырықтай жұмылған қоғам ғана болашағын қауіптен қорғай алады.
Жаһандық деңгейде әрекет ететін деструктивті ағымдарға қарсы тұру үшін ұлттық және діни-рухани құндылықтарды кеңінен насихаттау қажет. Бұл – тек құқық қорғау органдарының емес, бүкіл қоғамның, дін өкілдерінің, білім беру ұйымдарының және әрбір азаматтың ортақ міндеті.
Әлібек КЕМЕЛХАН
