Semeytany.kz — Көкпекті ауданында аудандық маңызы бар «Үлкенбөкен – Көкжайық – Үлгілімалшы» бағытындағы 26 шақырымдық автожолды жаңарту жұмыстары басталды. Бұған дейін бұл учаскеде тек ағымдағы жөндеу жүргізіліп келген.
Жоба екі кезеңге бөлінген. Алғашқы кезеңде 11 шақырым жол орташа жөндеуден өтуде. Облыстық бюджет есебінен қаржыландырылған жұмыстар шілде айында басталып, ойылған тұстар нығайтылып, негізі қиыршық таспен төселді.
Нысан бойынша қазіргі ахуал: учаскеде 14 техника мен 20 жұмысшы еңбек етуде, 2 шақырымнан астам жерге жаңа асфальт жабыны салынды.
Келесі кезеңде 15 шақырымдық бөлік жөнделеді. Бұл жұмыстар келер жылы қаржыландыру көлеміне қарай атқарылады.
