Үржар ауданында «Таза Қазақстан» бағдарламасы аясында сенбіліктер жалғасуда. Қоғамда экологиялық мәдениетті қалыптастыруға, қоршаған ортаның тазалығын сақтауға бағытталған іс-шараларға жастар, белсенді тұрғындар қатысуда.
— «Таза Қазақстан» акциясы аясында көктемде бастау алған тазалық жұмыстары аудан көлемінде тұрақты түрде жалғасуда. Аудан тұрғындары ағаш отырғызуға, өзен арналарын, жағалауларын, арықтарды тазартуға, қоқыс жинауға және қоғамдық орындарды абаттандыруға белсенді қатысты. Бұл – өңірдің тазалығына деген тұрғындардың жанашырлығы мен ортақ жауапкершілігінің нақты көрінісі. Акция басталғанда ауылдар арасында байқау жарияланып, аудандық штаб, арнайы комиссия құрылған болатын. Қазіргі таңда байқау жеңімпаздарын анықтау үшін комиссия мүшелері ауылдарды аралап жүр. Көшенің, ауылдың тазалығы әрбірімізден басталады. Мақсат – экологиялық мәдениетті қалыптастыру, тұрғындарды өз көшелерінің, аулаларының, елді мекендерінің тазалығына қамқорлық жасауға үндеу,- дейді «AMANAT» партиясының Үржар аудандық филиалының атқарушы хатшысы Елдос Бейсенов.
Апта сайын ауданға қарасты 35 елді мекеннен шамамен 2500-ге жуық тұрғын сенбіліктерге қатысып, 70-тен астам арнайы техника жұмылдырылған. Сенбілік жұмыстары барысында көшелер мен саябақтар тазартылып, 7 мың тоннадан астам қатты қоқыс шығарылған. Көгалдандыру жұмыстары барысында 7 мың түптен астам ағаш көшеттері отырғызылып, 432 шаршы метр жабын материалдары ауыстырылды. Тарихи-мәдени ескерткіштердің аумағы мен саябақтарда сенбіліктер өткізіліп, 58 шақырым болатын арықтар қоқыстан тазартылыпты.
Акция басталған күннен бастап әлеуметтік желілерде 2200-ден астам фото, бейнетүсірілімдер жарияланып, халық арасында кең қолдау тапты. Акция аясындағы сенбілік жұмыстары «Хабар 24» телеарнасы арқылы да көрсетіліп, оң баға берілді. Аудан орталығындағы LED экрандарда бейнероликтер жүйелі түрде көрсетіліп, тұрғындарды ақпараттандыру жұмыстары қатар жүріп жатыр.
Қоғамдық тәртіп пен тазалыққа байланысты Үржар аудандық полиция бөлімі тарапынан 211 әкімшілік хаттама толтырылып, 41 адамға айыппұл салыныпты.
Табиғатқа деген жанашырлық, қоршаған ортаның тазалығын сақтау – әр адамның бойында болуы тиіс қасиет. «Таза Қазақстан» акциясы аясындағы тазалық жұмыстары экологияны сақтауға, тұрғындардың қоршаған ортаға деген көзқарасын өзгертуге ықпал етуде.
Кәмшат СЕРІКҚЫЗЫ
