Жаз мезгілі — жеміс-жидек пен бақша өнімдеріне деген сұраныстың артатын уақыты. Алайда мамандар бұл өнімдерді тұтынуда сақ болуға шақырып отыр. Бақша дақылдарын сатып аларда олардың пісу уақыты мен сапасына ерекше назар аудару қажет. Бұл туралы Өңірлік коммуникациялар қызметі алаңында облыстық санитариялық-эпидемиологиялық бақылау департаментінің бөлім басшысы Айгерім Мусатаеваның қатысуымен өткен баспасөз мәслихатында айтылды.
Гүлім ЗАМАНБЕКҚЫЗЫ,
«Semeı tańy»
Өңірімізде соңғы екі жылда бақша өнімдерінен улану жағдайлары тіркелмеген. Дегенмен бұл — қауіп жоқ деген сөз емес. Департамент мамандары жоспарлы түрде зертханалық тексерулер жүргізіп отырады. Мысалы, өткен шілде айында 14 түрлі бақша өнімі тексеріліп, барлығының сынамасы талапқа сай болып шыққан.
– Көкөніс пен жеміс-жидекті тек пісу маусымына сай таңдаған дұрыс. Сонымен қатар оларды арнайы рұқсаты бар, сертификатталған сауда орындарынан алу қажет. Жол жиегінде бейберекет сатылып тұрған өнімдердің сапасына ешкім кепілдік бере алмайды, – деді Айгерім Ардаққызы.
Маман жеміс-жидек сатып аларда уланып қалмас үшін сертификаты бар дүкендерден ғана алуға кеңес берді. Көкөністер мен жеміс-жидектерді пайдаланар алдында мұқият жуу керек. Сақтау шарттарына мән беру қажет.
— Бақша өнімдерін күн көзінен қорғалған, салқын жерде сақтау қажет. Бақша өнімдерін дұрыс термиялық өңдеуден өткізіңіз. Әсіресе ерте піскен өнімдерде нитрат мөлшері жоғары болуы мүмкін,- дейді Айгерім Ардаққызы.
Бөлім басшысы қарбыз бен қауынның пісетін уақыты шілде мен қыркүйек айлары аралығы екенін ескертті. Бұл өнімдерді арнайы бақша павильондарынан немесе супермаркеттегі жабық сөрелерден сатып алған жөн. Ең бастысы, кесілген қарбыз бен қауынды сатып алуға болмайды. Қабығы бүлінген немесе жаншылған болса да қауын мен қарбызды сатып алмаған жөн. Бұл санитариялық талаптарға қайшы және бактериялық ластануға себеп болуы мүмкін.
— Жеміс-жидек пен бақша өнімдерінің сапасы мен қауіпсіздігін растайтын құжаттарды сұратуға құқықтарыңыз бар. Қарбыз бен қауынды тұтынар алдында сабынмен мұқият жуып, қайнаған сумен шаю керек. Қарбыз бен қауынды тамақ ішкеннен кейін ғана тұтынған жөн. Себебі олардың құрамында глюкоза мен талшық көп болғандықтан, аш қарынға ауыр тиюі мүмкін. Қауынның құрамындағы темір, кальций, магний мен А, В, С дәрумендері жүрек-қантамыр жүйесін нығайтып, асқазан жұмысын реттейді, сонымен қатар ағзаны токсиндерден тазартады. Ал қарбыздағы фолий қышқылы (В9 дәрумені) иммунитетті көтереді, әсіресе жүктілік кезінде аса пайдалы.
– Тамақ өнімдерін таңдауда мұқият болыңыздар. Бұл өзіңіздің және жақындарыңыздың амандығы үшін маңызды. Халықтың денсаулығы – басты құндылық. Сапалы өнім тұтынып, санитариялық талаптарды естен шығармайық,– деп түйіндеді сөзін Айгерім Ардаққызы.
