Semeytany.kz — Абай облысының Үржар ауданында кәмелетке толмаған балалар қатысқан жол-көлік оқиғасы тіркеліп, 2–7 жас аралығындағы үш бала көз жұмды, ал 6–9 жастағы тағы үш бала түрлі жарақатпен ауруханада жатыр.
Облыс әкімдігінің баспасөз қызметінің мәліметінше, зардап шеккендер – екі отбасының балалары. Қайтыс болғандардың екеуі Жарма ауданы Жаңғызтөбе ауылынан ата-әжесіне қонаққа келген, біреуі Үржар ауданында тұратын бала. Жарақат алған үш баланың екеуі – Үржар ауданынан, біреуі – Жарма ауданынан екені нақтыланды.
Оқиға орнына облыс әкімінің орынбасарының үйлестіруімен арнайы жұмыс тобы жіберілді. Қаза болған балалардың отбасыларына жерлеу рәсімін ұйымдастыруға қатысты барлық қажетті қолдау көрсетіледі, сондай-ақ психологиялық және материалдық көмек беріледі.
Абай облысының әкімі Берік Уәли қайғы жамылған отбасыларға көңіл айтып, өңір жұртшылығы атынан қайғыға ортақтасатынын жеткізді. Әкімдік бұл оқиғаны ерекше бақылауда ұстап отыр.
Президенттің тапсырмасымен Астанадан арнайы шақырылған білікті дәрігерлер жарақат алған балаларға көмек көрсетіп жатыр. Олардың жағдайы медициналық мамандардың тұрақты бақылауында.
