Semeytany.kz — Облыс әкімі Берік Уәли Озерки ауылдық округіне қарасты Каштак және Половинка ауылдарына барып, тұрғындар көтерген түйткілдерді тыңдады.
Каштакта интернеттің әлсіздігі, Семейге қатынайтын автобустың жоқтығы, балалар ойын алаңдарының тапшылығы айтылды. «Шағын елді мекен болсақ та, елеп-ескеріп келгеніңізге рахмет. Осы ауылда 15 жылдан бері тұрамын, облыс әкімі келген емес. Өзекті мәселелеріміз шешімін табады деп сенеміз», – деді ауыл тұрғыны Гүлмира Серікбаева.
Половинкада жол, ауыз су және медициналық пункт мәселелері көтерілді. Аудан әкімі Нұржан Әбдікәрімовтің айтуынша, Каштакқа 2026 жылы жаңа балалар ойын алаңы салынады. Биыл Половинкадағы ойын алаңының тозған төсеніштері жаңартылады. Сондай-ақ аудан бюджеті есебінен ауылішілік 1100 метр көшеге қиыршық тас төгіліп, тегістеу жүргізіледі.
Аймақ басшысы жауапты органдарға нақты тапсырма берді: Каштакқа интернет орнату бойынша ұсыныс әзірлеу, аудандық деңгейде автобус қатынасын келесі айдың ішінде іске қосу. Половинкадағы ауыз су мәселесі жыл соңына дейін шешіледі, ал сапалы интернет келесі жылы орнатылады. «Каштак та, Половинка да қалаға жақын ауылдар. Өзекті мәселелер жүйелі түрде шешіледі, барлығын жеке бақылауыма аламын», – деді Берік Уәли.
