Аягөз қаласындағы 2022 жылы тірек мектептер қатарына қосылған көпбейінді қазақ мектеп-гимназиясы аз уақыттың ішінде үлкен жетістіктерге жетіп, ауыл мектебінің де заманауи талапқа сай білім бере алатынын дәлелдеді. Мектеп директоры Айнұр Қанапянова осы жетістіктер жайында Қарағанды облысының Осакаров ауылында өткен тамыз саммитінде мектебіндегі өзгерістер мен жетістіктер жайлы айтып берді.
Қазақ мектеп-гимназиясында бүгінде 1300-ге жуық оқушы білім алады. 2022 жылы білім ордасы AITAS холдингі, Назарбаев зияткерлік мектептері мен «Қазақстан халқына» қоры бірлесіп жүзеге асырып жатқан «Ауылдық аймақтардағы тірек мектептердің әлеуетін арттыру» жобасына қатысушы ретінде таңдап алынды. Бұл ауыл мектебі үшін үлкен мүмкіндік болды.
Айнұр Әулейісқызы сол жылы ротация тәртібімен көпбейінді мектеп-гимназияға директор болып тағайындалды. Ол сол кезде-ақ білім ордасын тірек мектептер желісіне қосуды мақсат еткен екен. Мектеп басшысы бұл бастама ұстаздар ғана емес, ата-аналар тарапынан да зор қолдау тапқанын айтады.
– Тірек мектептер желісіне қосылу мектеп қана емес, аймақ үшін де үлкен серпіліс болды. Ата-аналарда үлкен сенім пайда болды. Жоба аясында алғаш рет мектепке құрал-жабдықтар жеткізілгенде ауыл тұрғындары, ата-аналар күні бойы жүріп, оларды кабинеттерге кіргізуге қуана көмектесті, – дейді мектеп директоры Айнұр Әулейісқызы.
Жоба аясында мұғалімдер үш жыл бойы Назарбаев зияткерлік мектептерінің біліктілікті арттыру курстарынан өтті. 2022 жылы мектеп педагогтерінің жартысына жуығының кәсіби санаты болмаса, бүгінде олардың 79 пайызы модератор, сарапшы, зерттеуші деңгейінде.
– Біздің мектеп биыл «100 үздік мектеп» байқауының жеңімпазы атанды, сондай-ақ Абай облысының «Үздік орта білім беру ұйымы» номинациясына ие болып, грант ұтып алды. Ал оқушыларымыз Біріккен Ұлттар Ұйымының Даму бағдарламасы ұйымдастырған STEM Skills Hackathon байқауында жеңіске жетіп, 3000 доллар көлемінде сыйақы алды, – дейді мектеп басшысы.
Аягөз мектеп-гимназиясының оқушылары бүгінде облыстық, республикалық деңгейдегі олимпиадалар мен сайыстарға белсенді қатысып жүр. ҰБТ нәтижесі де 71 балдан 82-ге дейін өскен. Бұдан бөлек, тірек мектеп ұстаздары шағын жинақталған ауыл мектептерімен де тұрақты байланыс орнатып, тәжірибелерін бөлісіп келеді. Бұл мектептердің көрсеткіштері де жақсарған. Мысалы, халықаралық ғылыми робототехника байқауында Ақшәулі мектебі 3-орын, республикалық «Зерде» ғылыми жобалар сайысында Майлин мектебі 3-орын, республикалық «Мұқағали оқуларында» Мыңбұлақ мектебі 2-орын иеленді.
— Мектебіміз — өзгерісті қабылдап қана қоймай, оны іске асыра алатын, дамуға ұмтылатын білім ордасына айналды. Бұл — ұжымның жаңашылдығының, ата-аналардың сенім көрсетуі мен оқушыларымыздың ізденімпаздығының, ең бастысы, барлық жағдайды жасап берген серіктестердің арқасы. Бұл жоба арқылы біз мектеппен бірге тұтас ауылдың да дамитынын көріп отырмыз, – дейді Айнұр Қанапянова.
Еске сала кетсек, «Назарбаев Зияткерлік мектептері» дербес білім беру ұйымы 2019 жылы ауыл мектептерін қолдау және озық тәжірибені тарату мақсатында «Ауыл мектебі powered by NIS» жобасын қолға алған. 2022 жылдан бастап ұйым «Қазақстан халқына» қоры және Білім беру саласын тұрақты дамыту қорымен бірлесіп, «Ауылдық аймақтағы тірек мектептердің әлеуетін арттыру» қайырымдылық жобасын сәтті іске асыруда. Жобаға еліміздің әр өңірінен 192 тірек мектеп қамтылып, жалпы көлемі 50 млрд теңгеге жуық қайырымдылық қаражаты бөлінген.
