Semeytany.kz – Абай облысында аймақ басшысы Берік Уәлідің төрағалығымен өткен әкімдік отырысында әлеуметтік-экономикалық даму мен бюджеттің орындалуы талқыланып, ауыл шаруашылығы санағына дайындық пысықталды.
Жиында Экономика және бюджеттік жоспарлау басқармасының басшысы Роза Құдайбергенқызы мен Қаржы басқармасы басшысының орынбасары Әйгерім Думанқызы баяндама жасады. Биылғы 7 айда әлеуметтік-экономикалық дамудың 12 көрсеткішінің 8-і бойынша өсім тіркелді. Өнеркәсіптің аймақ экономикасындағы үлесі – 40%: 17 ірі, 23 орта және 260 шағын кәсіпорын жұмыс істейді. Жыл басынан бері 1,5 трлн теңгенің өнімі өндіріліп, бұл өткен жылмен салыстырғанда ақшалай түрде 373,6 млрд теңгеге көп. Ауыл шаруашылығында 164,7 млрд теңгенің өнімі шығарылып, 2024 жылмен салыстырғанда 104,2% деңгейінде өсім көрсетілді.
Сонымен қатар тау-кен және өңдеу өнеркәсібінде, жеке инвестиция тарту мен тұрғын үйді пайдалануға беру бағыттарында төмендеу байқалды. Берік Уәлі нысаналы индикаторларға қол жеткізу, биыл іске қосылуы тиіс инвестициялық жобаларды жоспарлы қуатына шығаруды жеделдету және бюджет қаржысын толық игеру жөнінде тапсырма берді.
Ұлттық статистика бюросының департаменті Абай облысында ауыл шаруашылығы санағының өтіп жатқанын хабарлады. Санақ екі кезеңнен тұрады: 1–31 тамыз – онлайн, 20 қыркүйек–20 қазан – офлайн. Оған ауыл шаруашылығымен айналысатын заңды тұлғалар мен олардың бөлімшелері, шаруа және фермер қожалықтары, жеке кәсіпкерлер, сондай-ақ жеке қосалқы шаруашылықтары бар үй шаруашылықтары қатысады. Санақ объектілеріне жер алқаптары, мал мен құс, техника және жабдық, өндірістік әрі сақтау нысандары кіреді.
1–31 тамыз аралығында sanaq.gov.kz порталында онлайн сауалнама толтырылады. Жүйеге ЭЦҚ, QR-код немесе СМС арқылы кіру қарастырылған. 1–19 қыркүйекте деректер өңделеді, одан кейін интервьюерлер планшетпен үй аралап, офлайн сауалнама жүргізеді. Облыс бойынша 35 учаскеде 148 интервьюер жұмыс істейді. Жалпы 10 703 субъект есепке алынған, оның 8 131-і онлайн кезеңде тіркелді.
Аймақ басшысы көрсеткіші төмен қалалар мен аудандарға жұмысты күшейтіп, ауыл шаруашылығы санағының маңызын түсіндіру бойынша ақпараттандыруды жандандыруды тапсырды.
