Semeytany.kz — Абай облысының әкімі Берік Уәли Түркияның «Makimsan A.T.S St.» компаниясы президенті Атилла Күршат Дикчимен кездесіп, өзара түсіністік және ынтымақтастық туралы меморандумға қол қойды.
1969 жылдан бері жұмыс істейтін «Makimsan» Түркияда және шет елдерде халықаралық әуежайлар, қуатты ЖЭО, автомобиль және теміржол инфрақұрылымы, тоннельдер мен көпірлер, метро, әлеуметтік нысандар құрылыстарын жүзеге асырып келеді. Компанияның халықаралық жобалар портфелі 2,5 млрд АҚШ долларынан асады.
Меморандум шеңберінде Семей қаласындағы бірнеше көшеге теміржол үсті көпірлерін салу, «Мәңгілік Ел» көшесі мен Бейбітшілік аралын жалғайтын жаяу көпір тұрғызу, Семей мен Курчатов қалаларында және Аягөздегі сүзу алаңында кәріз-тазарту нысандарын салу жоспарланған. Сондай-ақ Семейде қоқыс полигоны мен Селевин көшесінен Шығыс кентіне дейін автокөлік және жаяу жүргіншілерге арналған көпір құрылысы, Семейдегі аспалы көпірді қайта жаңғырту, жаңа әкімшілік-іскерлік орталықта заманауи әкімшілік ғимараттар көтеру қарастырылған. Бұл жобалар жол инфрақұрылымын жаңғыртып, экологиялық ахуалды жақсартуға және тұрғындарға қолайлы орта қалыптастыруға бағытталады.
Аймақ басшысы инвесторларға қолдау көрсетілетінін атап өтіп, бастамалардың өңір экономикасына серпін беріп, жаңа жұмыс орындарын ашуға және қаланың заманауи келбетін қалыптастыруға ықпал ететініне сенім білдірді.
