Семей қаласындағы Абай атындағы театрда Қазақстан Республикасының Конституция күніне орай салтанатты іс-шара ұйымдастырылды.
Конституция – еліміздің басты саяси-құқықтық құжаты, мемлекеттіліктің іргетасы. Биыл Ата заңның қабылданғанына 30 жыл толып отыр. Осы уақыт ішінде Конституция тәуелсіз Қазақстанның даму жолындағы басты бағдаршамға айналды.
Салтанатты іс-шараға облыс әкімі Берік Уәли қатысып, жиналған қауымды мерейлі мерекемен құттықтады.
«Тәуелсіздіктің алғашқы жылдарында бекітілген төлқұжат 2022 жылдың 5 маусымында өткен жалпыұлттық референдумда толық реформадан өтіп, Ата Заңымыздың 33 бабына өзгерістер мен толықтырулар енгізілді. Шын мәнінде, Президентіміздің саяси ерік-жігерінің арқасында жүргізілген конституциялық реформаның нәтижесінде жан-жақты демократияландыру үдерістері басталды, саяси жүйені жаңғыртуға жағдай жасалды. Құқық қорғау институттарының және Адам құқықтары жөніндегі уәкілдің мәртебесі көтеріліп, Конституциялық Сот құрылды. Кешегі Күлтөбенің басындағы келелі кеңестерден туған «Әз-Тәукенің жеті жарғысы» аталатын жаңа мизамда жазылған «Әділетті қоғам», Абай жазған кешегі «Қарамола ережесінде» қамтылған «Әділдік», Алаш арыстары аңсаған «Теңдік» – Мемлекет басшысы Қасым-Жомарт Кемелұлы Тоқаевтың «Заң мен Тәртіп» қағидасына негізделген «Әділетті Қазақстан» тұжырымдамасында бір арнаға тоғысты. Осы ұлы құндылықтармен үндесіп жатқан «Әділдік бар жерде ынтымақтың туы жығылмас» деген халық даналығы бүгінгі Конституцияның рухымен ұштасып, мемлекетіміздің жарқын болашағына жол сілтеп тұр. Біз Ата Заңымызды ардақтап, елдігімізді нығайтып, әділет пен бірлікті сақтасақ, мемлекетіміздің мерейі үстем, болашағымыз жарқын болатыны сөзсіз», – деді аймақ басшысы.
Салтанатты шара барысында облыстың әлеуметтік-экономикалық дамуына үлес қосқан бірқатар азаматтар «Қазақстан Республикасының Конституциясына 30 жыл» мерейтойлық медалімен және облыс әкімінің Алғыс хаттарымен марапатталды. Конституция тарихы мен оның қоғамдағы маңызын айшықтайтын сахналық қойылым жұртшылық назарына ұсынылды. Белгілі айтыскер Аспанбек Шұғатай арнау айтып, Ұшқын Жамалбек, Әсет Есжан, Гүлдана Ноғайбаева, Мапруза Утуленова сынды әншілер партриоттық әндерді орындады.
