Елбасы өз Жолдауында «2015 жыл — Қазақстан халқы Ассамблеясы жылы» деп жариялағаны баршамызға мәлім. Ассамблея еліміздегі барлық этнос өкілдерін ортақ мақсатқа ұйыстыра отырып, РеспубликаДағы тұрақтылықты сақтау мен ел дамуының мақсатына айтулы үлес қосып келеді.
{jcomments on}Халықтар бірлігі мен ұлттар достығының киелі мекеніне айналған Көкпекті ауданында татар, орыс, неміс, қазақ ұлттарының этномәдени қоғамдық бірлестіктері өз ұлттарының салт-дәстүрлерін, мәдениетін сақтау және келер ұрпаққа насихаттау жұмыстарын жүргізе отырып, ауданның қоғамдық өміріне белсене араласуда.
6 ақпан күні бүкіл Қазақстан жерінің түкпір-түкпірінде бір мезетте бастау алған «Қазақстан халқы Ассамблеясы жылының ашылуы» синхрон-акциясы Көкпекті ауданының барлық елдімекендерінде өткізілді.
Аудан орталығы Көкпекті ауылындағы Қ.Алтынбаев атындағы Мәдениет үйінің кіші залында тақырыптық кітап, сурет және фотосуреттер көрмелері ұйымдастырылды.
Орталық алаңда аудандық жастар орталығының ұйымдастыруымен «Біздің күшіміз бірлікте» атты жастардың патриоттық акциясы өткізілді. Акция барысында Қазақстан Республикасының Мемлекеттік туы салтанатты түрде көтеріліп, жастарға аудандық Ардагерлер кеңесінің төрағасы өз лебізін білдірді.
Сонымен қатар ағымдағы күннің басты шарасы «Қазақстан халқы Ассамблеясы жылының ашылуы» синхрон-акциясы аудандық Мәдениет үйінде өткізілді. Түрлі ұлттар мен ұлыстардың ортақ тілегі — бейбітшілікті насихаттайтын ән мен жырлар, би мен әдеби-музыкалық қойылымдар залға лық толған көрермендердің көңілдерінен шықты. Синхрон-акция барысында түрлі ұлт өкілдері аудан тұрғындарын мерекемен құттықтай отырып, бейбітшілік тіледі.
Ауданның азаматтық қоғам өкілдеріне арналған «Бір ел, бір тағдыр» атты дөңгелек үстел ұйымдастырылып, бірқатар мәселелер талқыланды. Синхрон-акция аясында аудан орталығында жастарға арналған тақырыптық патриоттық көңілді жайдарман лигасы өткізілді.
А. САҒЫНДЫКОВА,
Көкпекті аудандық ішкі саясат бөлімінің бас маманы.
