Semeitany.kz — Облыс әкімі Берік Уәли Үржар ауданының Қызылту ауылындағы су жинау станциясын қарап, ауыз су жобасының барысымен танысты. Аудан әкіміне қалған елді мекендердегі құбыр тарту жұмыстарын мерзімінде аяқтауды тапсырды.
Қызылтуда былтыр 6,5 шақырым су желісі жүргізілсе, биыл 7,3 шақырым желі тартылып, екі су көтеру ғимараты, су резервуарлары мен мұнарасы салынуда. Құрылыс қазір 90 пайызға орындалған. Нысан толық біткен соң 160 абонентке (582 тұрғын) сапалы ауыз су беріледі.
Үржар ауданында бұған дейін 30 ауыл орталықтандырылған су жүйесіне қосылған. Қазір Қызылтумен бірге Барқытбел, Егінсу, Қазымбет және Ер Қабанбай ауылдарында құбыр тарту жүріп жатыр. Осы жобалар аяқталғаннан кейін аудан халқы таза ауыз сумен 100 пайыз қамтылмақ.
«Мемлекет басшысының халықты 100 пайыз таза ауыз сумен қамтамасыз ету туралы тапсырмасы бар. Облыс бойынша биыл 33 жоба іске асырылып жатыр. Үржар ауданындағы 2700 тұрғыны бар 5 елді мекенді ауыз сумен қамту жоспарланған. Жұмыстардың сапасы мен мерзімі жеке бақылауымда», – деді Берік Уәли.
