Semeitany.kz — Үржар ауданына келген облыс әкімі Берік Уәли тұрғындармен жүздесіп, өңірдің әлеуметтік-экономикалық дамуы және алдағы жоспарлар жөнінде баяндама жасады. Алдымен аудан әкімі Ақылбек Башимбаев 2024–2025 жылдардағы негізгі көрсеткіштер мен атқарылған істерді таныстырды.
Ауыл шаруашылығында Үржар ауданы өңірде алқап көлемі бойынша екінші орында: биыл 113 мың гектар егістік игерілді. «Кең дала – 2» бағдарламасы арқылы облыста берілген 9,5 млрд теңгенің 1,9 млрд теңгесі жергілікті аграрларға бағытталды. 2028 жылға дейінгі инвестициялық жобалар картасы аясында ауданда жалпы құны 7,8 млрд теңге болатын 9 жоба іске асырылуда.
Сумен жабдықтау бойынша облыста 33 жоба жүріп жатыр, соның бесеуі Үржар ауданының ауылдарын қамтиды. Ұзаққа созылған Егінсу мен Барқытбел жобаларын қайта жандандыру үшін қосымша қаржы бөлінді. Жыл соңына дейін Үржар, Алтыншоқы, Науалы және Некрасовка ауылдарының көшелеріне жарық шамдары орнатылады.
Жол саласында облыс бойынша 358 шақырым жөндеу жоспарланған. Үржарда Жоғарғы Егінсу, Жанай, Ақжар, Жаңа Тілек, Қарақол ауылдарының көшелеріне орташа жөндеу жасалды. Тұрғын үй бағытында биыл өңірде 1146 жалға берілетін пәтер сатып алу көзделсе, оның 114-і Үржар ауданы тұрғындарына беріледі.
Білім және әлеуметтік салада Абай атындағы мектеп-балабақша мен Бауыржан Момышұлы атындағы мектепке күрделі жөндеу жүргізілуде. Аудандағы 11 мектеп пен Бестеректегі «Тарбағатай» лагері ағымдағы жөндеуден өтті. Жеті мектепке пәндік кабинеттер алынып, Бауыржан Момышұлы мектебі 425 парта және асхана жабдықтарымен толықты. Жоғарғы Егінсуда 100 орындық клуб салынды, Үржар ауылының Мәдениет үйіне жобалық-сметалық құжаттама әзірленіп жатыр. Аудандық ауруханаға жаңа медициналық жабдықтар жеткізіліп, жыл соңына дейін күндізгі стационары бар дәрігерлік амбулатория пайдалануға берілмек. Балаларға әлеуметтік қызмет көрсету орталығының ғимараты да күрделі жөндеуден өтуде.
Кездесуде тұрғындар Мәдениет үйі, спорт кешені, балабақша, медицина қызметкерлеріне жатақхана, тест тапсыратын орталық ашу, ауыз су және жол жөндеу сияқты мәселелерді көтерді. «Үржар – шежірелі тарихы мен еңбекқор халқы бар қасиетті мекен. Мұндағы мәселелерді білемін. Атқарылар жұмыс көп, бәрі кезең-кезеңімен шешіледі», – деді Берік Уәли.
