Жылдың басында Үржар ауданында «Ер Төстік» балабақшасы ашылса, игілікті істің ізі суымай тұрып, «Болашақ» атты бүлдіршіндердің тағы бір көрікті ордасы пайдалануға берілді.
{jcomments on}Айта кетерлігі, аудан тарихында бұл балалар бақшасы — алғашқы жекеменшік балабақша. Мекеменің ашылуына кәсіпкер Сәуле Тұрлыбекова мұрындық болған. Балғындарға есігін айқара ашқан балабақшаның салтанатты ашылуына аудан басшысы Серік Зайнулдин, облыстық мәслихаттың депутаттары, аудандық Ардагерлер кеңесінің мүшелері, аудан тұрғындары қатысты.
Салтанатты шарада сөз алған аудан әкімі Серік Зайнулдин аймақ басшысы Даниал Ахметовтің балғындарды балабақшамен қамту мақсатында ауданда тек қана мемлекеттік емес, жекеменшік балабақшалардың да болу керектігін айтқанын жеткізді. Тапсырманы жүзеге асыру үшін аудан басшылығы кәсіпкер Сәуле Сұлтанбекқызына ұсыныс жасап, нәтижесінде «Ер Төстік» балабақшасының бұрынғы бос қалған ғимаратында жаңа балабақша ашу ісі қолға алынған.
— Балабақшаның ашылуымен аудан әкімдігі атынан, аудандық мәслихат атынан құттықтаймын. Ауданда 1500-ден артық бала 31 балабақшада тәрбиеленуде. Үржардың тарихында бірінші рет жекеменшік балабақша ашылып отыр. Балабақшаның іші күлкіге толсын, — дей келе, балабақша ашу ісінде Үржардан шыққан бірінші кәсіпкер ана Сәуле Солтанбекқызына алғыс айтып, еңбегіне жеміс тіледі.
Аудан әкімінің ақжарма тілегінен соң балабақша ғимараты салтанатты түрде ашылып, лента қию құрметі облыстық маслихаттың депутаты Р.Жанкүшікова мен аудандық Ардагерлер кеңесінің төрағасы Н.Сандыбаевқа бұйырды.
Балабақша жекеменшік болғанымен, мемлекет тарапынан қолдау жоқ емес. Ғимараттың жылуына, мамандар ұстауға, қажетті құрал-жабдықтар алуға арнайы қаржы бөлінеді екен. Бөлмелері де кең, жалпы, балғындарға барлық жағдай жасалған. 27 маман жұмыспен қамтылыпты.
— Жаңа балабақшамыз 50 балаға арналған. «Қарлығаш» және «Айгөлек» атты екі топтан тұрады. Бүгінгі таңда әр баланың тамағына айына 10 мың теңге жұмсалады. Алғашқы күннен бастап-ақ сұраныс көп, — дейді Сәуле Тұрлыбекова балабақша жайлы.
Бауыржан ЖАҚЫП,
«Семей таңы»
